Sport24.az
"Səbail"i yaxşı təhlil etmişdik. Şahin Diniyevin komandası mübarizə aparmağı xoşlayan, hücumda çoxalmağı bacaran komandadı. Odur ki, onlara boşluq verməməyə çalışdıq. Şükürlər olsun ki, ehtiyatlı oyunla 3 xalı qazandıq". Bu sözləri Sport24.az-a açıqlamasında "Turan Tovuz"un futbolçusu Şəhriyar Əliyev deyib.
"Boz qurdlar"ın kapitanı komandasının uğurlu seriyasını şərh edib: "Bəlli bir sistemimiz var. Kollektiv olaraq maksimum çalışırıq ki, baş məşqçinin futbol fəlsəfəsinə, tətbiq etdiyi sistemə tam uyğunlaşaq. Əlbəttə ki, 4 qələbə, 1 heç-heçə pis nəticə deyil və əziyyətimizin bəhrəsidi. Amma bununla kifayətlənmək olmaz. Daha da artırmalıyıq".
Fernandu Santuş tərəfindən milliyə dəvət olunan təcrübəli müdafiəçi portuqaliyalı mütəxəssisin etimadını qazanmağa çalışacağını vurğulayıb: "Ölkənin əsas komandasına yenidən dəvət almaq xoşdu. Hər bir futbolçu yığmada oynamaq və özünü yaxşı tərəfdən göstərmək istəyir. "Turan Tovuz"dan mən və Xəyal Nəcəfov ölkənin əsas komandasına dəvət olunmuşuq. Odur ki, məşqlərdə özümüzü maksimum yaxşı tərəfdən göstərib yeni baş məşqçinin rəğbətini qazanmağa çalışacağıq".
Qeyd edək ki, Premyer Liqanın V turunda "Turan Tovuz" öz meydanında "Səbail"I minimal hesabla məğlub edib – 1:0
ABDULLA İSMAYILOĞLU
