Idman.biz
"Turan Tovuz"un kapitanı Şəhriyar Əliyev Sportal.az saytına müsahibəsi
- Zədədən sonra hazırda vəziyyətin nə yerdədir? Fərdi məşq edirsən?
- İndi yaxşıyam. Ayağımdakı zədənin hardasa 10 faizi qalıb. Əvvəlki kimi ağrılarım yoxdur. Fərdi məşqlərə başlamışam. Bir həftədir stadionda qaçıram. Zaman aparan məsələdir. Tam sağalmağa çalışıram.
- Ümumiyyətlə, mövsümün qalan hissəsində oyuna çıxmaq şansın var? Yoxsa, artıq yeni mövsümə hazır olmaq istəyirsən?
- Tam bilinmir. Çempionatın bitməsinə 3 tur qalıb. Bu da 2-3 həftə edir. Mən isə heç fərdi olaraq tam 100 faiz məşq edə bilmirəm. Fərdi 100 faiz məşq etdikdən sonra komandaya qoşulacam. Həkimin dediyi templə gedirəm. Bu, 50-60 faizdir. Zaman göstərəcək. İstəyərəm ki, komandaya kömək edim.
- Bir ara Türkiyədə müalicə edildin. Ümumiyyətlə, nə baş verdi ki, geridönüşün baş tutmadı?
- Türkiyədə 15-16 gün müalicə aldım. Əzələmdə ağrılar sağalsa da, əzələmin altında problemlər qalmışdı. O da elə bir şeydir ki, qan yığılmışdı və o da məni çox incidirdi. Əməliyyat da oluna bilərdim, amma müalicə ilə sağaldım. Müalicəmin tam düzəlməsinə 10 faiz qalıb. Həkimlərimiz risk etmək istəmirlər. Zədə aldıqdan sonra bəlkə də bərpa prosesində bir az yanlışlıq oldu. Ona görə belə problem yaşandı.
- "Turan Tovuz"u meydanda olmasa da, meydandan kənarda dəstəkləyirsən. Yəqin ki, meydandan kənar daha çətindir, nəinki meydanda?
- Meydanda olmasam da, komandamın yanında olmağa çalışıram. Kənardan baxmaq çox çətindir. Komandaya kömək etməyi çox istəyirəm. Tam sağaldıqdan sonra komandaya kömək edəcəm.
- "Turan Tovuz" 4-cü pillədədir və uzun müddətdir ki, uğurlu nəticə qazana bilmir. Bunu nə ilə əlaqələndirirsən? Səncə, komanda nəyə görə belə qeyri-stabil çıxış etdi?
- "Araz-Naxçıvan"la aramızda xal fərqi var. Çalışacağıq ki, qarşıdakı 3 turda maksimum nəticə qazanaq. "Araz-Naxçıvan" da üçüncü yer üçün mübarizə aparır. Premyer Liqada çox qızğın mübarizə gedir. Bəzi oyunlarda xallar itirdik. Düzdür son oyunlarda qələbə qazana bilmirik. Şanssızlıq da yaşadıq. Zədəli və cəzalı futbolçularımız oldu. Bu da oyunumuza təsir etdi. Düşünürəm ki, zədəlilərimiz tez komandaya qoşular və həmişəki kimi mübarizəmizi aparırıq. İtkilərimiz çox idi. Onların yerini dolduran futbolçular da bunun öhdəsindən gəlməyə çalışırlar.
- Avrokuboklara yollanmaq üçün 4-cü yeri tutub, "Qarabağ"ın kubokun finalında "Sabah"ı məğlub etməsini gözləməlisiz. Səncə, bütün bunlar reallaşacaq?
- Biz sırf 4-cü yeri fikirləşmirik. Üç oyunda maksimum xallar yığmağı düşünürük. "Araz-Naxçıvan" bizdən 6 xal öndədir. Onlar bir qələbə ilə 3-cü yeri tutacaqlar. Amma biz sona qədər mübarizə aparmağa çalışacağıq. Hər kəs avrokuboklarda iştirak etmək istəyər. Ona görə də finalda "Qarabağ"ı dəstəkləyərəm ki, kubokun qalibi olsun. Bu dəqiqə özümüzü fikirləşirik ki, qalib gələk və yuxarı pillələrə qalxaq. Dördüncü yeri tutsaq, istəyərəm ki, "Qarabağ" qlaib gəlsin və biz avrokuboklara yollanaq.
İdmanbiz
