Sport24.az
Bu gün I Liqada 15-ci tur start götürür. Turun mərkəzi oyununda lider "Şəfa" dördüncü pillədə qərarlaşan "Mingəçevir"i qəbul edəcək. Meydan sahibləri 14 turdan sonra 32 xalla çempionatın lideridir, "Mingəçevir" isə 25 xalla dördüncü pillədədir. Nəzərə alsaq ki, çempionatın sonuna hələ 19 tur var, deməli, rəqiblər arasındakı 7 xal ciddi fərq deyil. Hər halda qarşıda hələ 57 xalın taleyi həll olunacaq.
Lider olmasına baxmayaraq, "Şəfa" son turlar çempionluq mübarizəsində "Mingəçevir"lə yanaşı, əsas rəqibləri olan "Baku Sportinq" və "Səbail"in nəfəsini yaxından hiss edir. Bunda isə təbii ki, komandanın mövsümün ikinci yarısına istənilən səviyyədə start verməməsinin böyük rolu var. "Şəfa" qış fasiləsindən sonra əvvəlcə "Baku Sportinq", daha sonra isə "Səbail"lə heç-heçə etdi. Düzdür, komanda əsas rəqiblərinə uduzmayıb. Lakin fasilədən sonra ilk "dördlük"də qərarlaşan komandalar arasında qələbə üzünə həsrət tək komanda olması ciddi siqnaldı. "Şəfa"nın istər maliyyə durumuna, istərsə də heyətinə görə bütün rəqiblərini nəzərə çarpacaq dərəcədə qabaqladığını da əlavə etsək, vəziyyətin dramatik həddə çatdığını söyləyə bilərik.
Üstəlik, növbəti rəqib "Mingəçevir"dir. Belədə, "Şəfa"nın qış fasiləsindən sonra qələbəsizlik seriyasının davam etmə ehtimalı az deyil. Bu baş verəcəyi təqdirdə yeni qurulmağa başlayan binanın sütunlarının çat verəcəyini proqnozlaşdırmaq olar. Hər halda klub prezidenti Sərdar Salmanzadənin baş məşqçi haqda söylədikləri də bu cür düşünməyə rəvac verir: "Əlbəttə, bütün komandalarda belədir ki, ardıcıl məğlubiyyətlər olacağı təqdirdə nəticələrə cavabdeh şəxs olan baş məşqçi ilə yollar ayrılır" (idmanxeber). Bunu baş məşqçi Elgiz Kərəmli də gözəl anlayır. Üstəlik, hər bir kollektivdə baş məşqçini sevənlər də olur, sevməyənlər də. İkincilərə aid olanların mümkün büdrəmədən istifadə etmək cəhdlərinin də daxili ab-havaya təsir edəcəyi gün kimi aydındı.
Digər tərəfdən "Baku Sportinq"in bu tur "Cəbrayıl", "Səbail"in isə MOİK-lə oynadığını nəzərə alsaq, böyük ehtimal, bu kollektivlər liderlə xal fərqi daha da azaldacaqlar. Belədə "Şəfa"nın bu psixoloji təzyiqə nə dərəcədə hazır olduğu, necə tab gətirəcəyi maraqlıdır. Hər halda cari mövsüm məğlubiyyət kimi acını dadmayan komandanın sonrakı durumu ciddi fəsadlara səbəb ola bilər.
Üstəlik, "Mingəçevir" də liderlə matça yalnız qələbə üçün çıxacaq. Qış fasiləsində heyətini xeyli gücləndirən, Amil Yunanov, Fuad Bayramov, Nurlan Novruzov, Elçin Mustafayev, Bahadur Həziyev, Nika Çaçaşvili kimi Premyer Liqa təcrübəsi olan futbolçuları transfer edən bölgə təmsilçisinin hədəfi çempionluqdur. İddiasını ortaya qoymaq üçün isə lider üzərində qələbədən gözəl nə ola bilər!? "Mingəçevir" tərəfi də anlayır ki, "Şəfa" ilə görüşdə məğlubiyyət komandanın iddiasına olduqca ciddi zərbə olar. Bu səbəbdən də hər iki tərəf oyuna çox böyük gərginliklə çıxacaq. Belədə isə əsas yük baş məşqçilərin üzərinə düşəcək. Əlbəttə, müqayisə aparsaq, "Mingəçevir"in baş məşqçisi Ramiz Məmmədov "Şəfa"dakı həmkarı Elgiz Kərəmlini təcrübə baxımından qat-qat üstələyir. Ramiz Məmmədov nəinki aşağı liqa, Premyer Liqada da böyük təcrübəyə malikdir. Hətta ölkə xaricində belə çalışmağa fürsət tapıb. Elgiz Kərəmli isə ötən il ikinci liqada heyətinin genişliyinə baxmayaraq, "Şahdağ-Qusar"ı irəli buraxdı və yalnız ikinci olmaqla kifayəyləndi.
"Şahdağ-Qusar" demişkən, maraqlıdır ki, bu komandanı hazırda Kərəmlinin atası, məşhur veteran futbolçu Nazim Əliyev çalışdırır. Soyadları fərqli olsa da, onların ata-oğul olduqları çoxlarına məlumdur. Belədə "Şəfa"nın "Şahdağ-Qusar"la oyunları da maraqla gözlənilir. Hər halda Qusar təmsilçisinin cari mövsüm üçün heç bir iddiası qalmayıb.
