Idman.biz
"Artıq 3 yoxlama oyunu keçirmişik. Hər şey hazırlıq planına uyğun gedir".
İdman.biz xəbər verir ki, bunu Sport24.az-a açıqlamasında "Qəbələ"nin idman direktoru Səbuhi Səfiyarlı deyib.
Klub rəsmisi yenidən elitaya qayıdan "Qəbələ"nin növbəti mövsüm üçün hədəflərindən danışıb: "Baş məşqçi komandanın performansından razılığını bildirib və oyundan-oyuna daha yaxşı çıxış etdiyini deyib. Amma heyətin tam hazır olduğunu demək olmaz. Çünki transferlər olacaq. 3-4 oyunçu ilə güclənməyi düşünürük. Danışıqlar gedir. Böyük ehtimal legionerlərlə anlaşacağıq. Onların transferindən sonra komandanı hazır saymaq olar. Hələ ki, işlər davam edir. Çempionatın startını gözləyirik. Həmişə dediyimiz kimi "Qəbələ"nin adına layiq futbol oynamağa çalışacağıq. Komanda tam formalaşandan və legionerlərin vəziyyətinə baxandan sonra özümüz üçün hədəf müəyyənləşdirə bilərik".
Qeyd edək ki, son yoxlama matçında "qırmızı-qaralar" "Sumqayıt"a 1:0 hesabı ilə qalib gəlib. Ondan əvvəl isə kaxaber Tsxadadzenin yetirmələri "Şamaxı" (2:1) və "Kəpəz"i məyus edib (2:0).
İdman.biz
