Səbuhi Səfiyarlı hesab edir ki, gəncləri dərhal Premyer Liqa səviyyəsində yarışlara cəlb etmək əlverişli nəticələr verməyə bilər

"Mövsümün əvvəlində hamı "Qəbələ"ni favorit göstərirdi. İlk oyunlardan göründü ki, asan olmayacaq. "Karvan" liderliyi ələ keçirdi, "İmişli" yaxşı futbol göstərirdi. Sona qədər də bu 3 klub arasında mübarizə davam edir. "Karvan"la həlledici oyunumuz oldu ki, qələbə qazanıb ilk pilləyə yüksəldik. Bundan sonra liderliyimizi davam etdiririk. Futboldur, hansısa matçda büdrəmək, səhv etmək bizə baha başa gələrdi. Sona qədər ehtiyatlı davrandıq. Məşqçilərdə narahatçılıq var idi ki, futbolçularda arxayınlıq yaranar. Buna görə də bu period asan olmadı. Yenə də şükür, qarşımıza qoyduğumuz hədəfə çatdıq. Yenə də klub rəhbərliyinin qarşıya qoyduğu tapşırıq budu ki, komanda çempionluq uğrunda mübarizə aparmalıdır". Bu sözləri Sport24.az-a açıqlamasında"Qəbələ"nin idman direktoru Səbuhi Səfiyarlı deyib.

Səfiyarlı Premyer Liqa ilə Birinci Liqa arasında olan fərqdən də danışıb: 

"Təkcə Azərbaycanda deyil, bütün dünyada belədir ki, liqalar arasında fərq var. Həm şərait, stadionların vəziyyəti, oyunçuların səviyyəsi getdikcə aşağı düşür. Bu da oyunun keyfiyyətinə təsir edir. Ola bilər ki, bu hansısa ölkədə 3-cü, 4-cü liqada başlayır. İkinci Liqada "Cəbrayıl"da çalışanda da futbolçularla danışırdım. Baxırsan ki, perspektivli oyunçular var, bəzilərinin potensialı Premyer Liqada oynamağa imkan verir. Sadəcə, yanaşmaları düzgün deyil. Sanki fikirləşirlər ki, Birinci və ya İkinci Liqa səviyyəsində oyunçuyuq və özlərinə qarşı tələblərini dəyişmirlər. Halbuki üzərlərində işləsələr, məşq prosesini artırsalar, istirahətlərinə, qidalanmaya fikir versələr, Premyer Liqada oynayacaq oyunçulardır".

O, növbəti mövsümdə komandanın heyətinə legionerlərin cəlb olunacağını açıqlayıb:

"Qəbələ"nin imici var. Hamı başa düşür ki, "Qəbələ" nə deməkdir, burda əsasən akademiyanın futbolçularına üstünlük verilib. Yenə də belə olacaq. Murad klubumuzun yetirməsidir. Gəncləri birdən birə Premyer Liqada mübarizəyə atmaq baha başa gələ bilər. Balanslaşdırılmış heyət formalaşdırmağa düşünürük. Akademiyanın futbolçularının hansının daha güclü, rəqabətə hazır olduğunu götür-qoy edəndən sonra yerdə qalan mövqelərə legionerlər cəlb olunacaq. Bu da normal haldır".

Qeyd edək ki, ki, "Qəbələ"nin Premyer Liqaya qayıtması I Liqanın XX turunda dəqiqləşib. "Baku Sportinq"lə qarşılaşan Kaxaber Tsxadadzenin yetirmələri 5:0 hesablı qələbə qazanıblar. 4-cü pillədə qərarlaşan "Baku Sportinq"lə xal fərqini 26-ya çatdıran "Qəbələ" sona 7 tur qalmış elitaya vəsiqə verən ilk "üçlük"də yerini təmin edib.