Sport24.az
"İmkanlarımız oldu, yararlana bilmədik. Nəticədə məğlub olduq. Bu matçı unudub gələcək oyunlara köklənməliyik". Bu sözləri Sport24.az-a açıqlamasında "Sumqayıt"ın futbolçusu Səbuhi Abdullazadə Misli Premyer Liqasının 28-ci turunda "Araz-Naxçıvan"a məğlub olduqları (2:0) oyundan sonra deyib.
Gənc futbolçu komandasının turnir cədvəlindəki mövqeyini dəyərləndirib:
"Məncə, Premyer Liqada qalmağın öhdəsindən gəlmişik. Düşünmürəm ki, bundan sonuncu pilləyə yuvarlana bilərik. Komanda olaraq qeyri-sabit çıxış ediriksə, heyətin üzvü kimi mən də məsuliyyət daşıyıram. Qarşıda "Şamaxı" ilə oyun var. Bizim üçün vacib matçdır. Doğma meydanda azarkeşlərimizi sevindirmək istəyirik".
Qeyd edək ki, "Sumqayıt" Misli Premyer Liqasında 28 turdan sonra 29 xalla 7-ci yerdə qərarlaşıb.
