Idman.biz
"Ayxan Abbasovla əvvəllər "Sumqayıt"da birgə çalışmışam və onun məşqçiliyinə heç bir söz ola bilməz. O, hər zaman futbolçularla düzgün münasibət qurmağı, komandada birlik və intizam yaratmağı bacarıb. Ən azından Fernandu Santuşdan fərqli olaraq bizə milli ruhu hiss etdirdi".
İdman.biz xəbər verir ki, bu sözləri Futbolinfo.az-a açıqlamasında Azərbaycan millisinin futbolçusu Səbuhi Abdullazadə deyib.
23 yaşlı yarımmüdafiəçi Ukrayna ilə oyundan da danışıb: "Bir neçə gün öncə ağır məğlubiyyət yaşamışdıq. Belə nəticələr futbolun bir hissəsidir, amma istər-istəməz oyunçulara təsir edir. Çalışırdıq ki, bu dəfə meydana çıxanda həmin uğursuzluğu unutduraq və tam başqa ab-hava ilə oynayaq. Açığı, matç çox gərgin və maraqlı keçdi. Meydanın hər qarışında mübarizə aparmaq lazım gəlirdi. Biz də son saniyəyə qədər döyüşdük, heç bir anda geri çəkilmədik. Sonda bərabərlik qazandıq və bu nəticə komanda olaraq bizi motivasiya baxımından bir qədər də gücləndirdi. Ən əsası odur ki, hamı meydanda bir nəfər kimi vuruşurdu".
Abdullazadə, həmçinin gələcək planlardan bəhs edib və məşqçi məsələsinə də münasibət bildirib: "Əslində, futbolçular üçün əsas məsələ meydana çıxıb tapşırıqları yerinə yetirməkdir. Hansı məşqçi təyin olunursa-olunsun, biz onun dediklərini tam şəkildə icra etməliyik. Çünki komandanın uğuru bundan asılıdır. Rəhbərlik hansı qərarı versə, biz oyunçular o qərarı qəbul edib maksimum dərəcədə yerinə yetirməyə çalışacağıq. Hər birimizin arzusu odur ki, Azərbaycan millisi daim uğurlu olsun. Mən də üzərimə düşəni yerinə yetirib həm özümü, həm də ölkəmi layiqincə təmsil etmək istəyirəm".
İdman.biz
