Idman.biz
"Səbail"in müdafiəçisi Səbayıl Bağırovun futbolinfo.az saytına müsahibəsi
– I Liqada yeni mövsümün startına yarım ay qalıb. Hazırlıq prosesi necə gedir? "Səbail" yeni sezona tam hazırdır?
– Hazırlıq prosesi planlaşdırdığımız kimi gedir. Fiziki və taktiki baxımdan ciddi şəkildə çalışırıq. Bir neçə yoxlama matçı keçirmişik və növbəti günlərdə də oyun praktikasını artırmaq üçün görüşlərimiz olacaq. "100 faiz hazırıq" demək üçün hələ tezdir. Amma starta qədər tam hazır olacağımıza inanıram.
– İlk turda "Mingəçevir"i qəbul edəcəksiniz. I Liqaya qələbə ilə başlaya biləcəksiniz?
– İlk oyunlar həmişə çətin olur, çünki rəqibin də necə hazırlaşdığını tam bilmək olmur. Biz öz oyunumuzu göstərməyə çalışacağıq. Məqsədimiz mövsümə qələbə ilə başlamaqdır və buna gücümüzün çatacağına inanıram.
– "Səbail"in qarşısına konkret olaraq I Liqa çempionluğu hədəf qoyulub, yoxsa məqsəd çempionluq olmadan da Premyer Liqaya qayıtmaqdır?
– Əsas məqsəd Premyer Liqaya qayıtmaqdır. Amma əlbəttə ki, çempionluq hər bir futbolçu üçün əlavə motivasiyadır. Biz maksimum nəticə üçün mübarizə aparacağıq.
– I Liqa təmsilçiləri arasında hansı komandaları əsas rəqibləriniz hesab edirsiniz?
– Bu mövsüm çox güclü rəqabət olacaq. Bir çox yaxşı yığılmış komanda var və çempionat asan keçməyəcək. Hər matçda maksimum diqqətli olmağa, öz oyunumuzu göstərməyə çalışacağıq.
– "Səbail"in heyətində Premyer Liqa təcrübəsi olan xeyli sayda futbolçu toplaşıb. Bu, komandanın uğurlu çıxışı üçün yetərli olacaqmı?
– Premyer Liqa təcrübəsinə malik futbolçuların olması böyük üstünlükdür. Onlar həm meydanda, həm də komanda daxilində önəmli rol oynayırlar. Amma təkcə təcrübə kifayət deyil, hər kəs maksimal səviyyədə çalışmalı və meydanda bunu göstərməlidir.
– Həm Premyer Liqa, həm də I Liqa təcrübəniz var. "Şamaxı"nın heyətində I Liqada çempionluq da yaşamısınız. 1 il Premyer Liqada oynadıqdan sonra yenidən I Liqada çıxış etmək sizi geri salmayacaq?
– Mənim üçün əsas olan daim oynamaq və komandama faydalı olmaqdır. Hər iki liqada təcrübə toplamaq futbolçu üçün üstünlükdür. Əksinə, bu mənə daha çox məsuliyyət verir. Çünki hədəf yalnız I Liqada qalmaq deyil, komandanın Premyer Liqaya qayıtmasına kömək etməkdir.
İdman.biz
