“Səbail”in israilli legioneri: “Çatışmazlıqları aradan qaldırıb irəli baxmalıyıq”

Dünən keçirilən"Zirə" - "Səbail" qarşılaşması ilə Premyer Liqanın I turuna yekun vuruldu. 5 qolun vurulduğu görüşdə meydan sahibləri qalib gəldi. Bu oyunda "dənizçilər"in heyətində Azərbaycan çempionatında debüt edən legionerlər var idi ki, onlardan biri də Gitay Sofir idi. Yəhudi futbolçu matçdan sonra Sport24.az-a müsahibə verib.  

- Azərbaycana xoş gəlmisən. Ölkəmiz haqqında təəssüratların maraqlıdı...
- Azərbaycan çox yaxşı ölkədi. İnsanlarınız gülərüz və istiqanlıdı. Qısa zamandı burdayam. Buna baxmayaraq, özümü rahat və doğma məkandakı kimi hiss edirəm.

- Bu gün Premyer Liqada debüt etdin. Şərəfini qoruduğun "Səbail" çempionatın ilk turunda məğlub oldu. Meydandan uğursuz nəticə ilə ayrılmamağınızı nə ilə izah edərdin?
- İlk yarı bizim üçün yaxşı keçmədi. Ardıcıl qollar buraxdıq. Amma fasilədən sonra toparlanaraq hücumlar təşkil etdik. Təəssüf ki, şanslarımızdan ancaq birini qola çevirə bildik. Ümumi götürəndə oyunumuz istədiyimiz kimi alınmadı. Bir çox səhvlərə yol verdik. Düşünürəm ki, çatışmazlıqları aradan qaldırıb irəli baxmalıyıq.

- Yeni kollektivə tam uyğunlaşmısan?
- Adaptasiyada problem olmadı, yaxşı kollektivimiz var. Bircə qalıb meydanda da özümü yaxşı tərəfdən göstərib komandaya faydalı olmaq.  

- İlk dəfədi bir azərbaycanlı baş məşqçinin rəhbərliyi altında oynayırsan. Şahin Diniyevi məşqçi necə xarakterizə edərdin?
- Zəngin futbol savadına malik mütəxəssisdi. Hər məşqdə öz futbol fəlsəfəsini futbolçulara aşılamağa çalışır. Bir sözlə, yaxşı məşqçimiz var.

- Texnikalı və sürətli oyunçusan. Məhz sən meydana daxil olandan sonra komandanın hücumları daha kəsərli alındı...
- Bura gəlmişəmsə, maksimum komandama fayda verməkdə maraqlıyam. Konkret olaraq qarşıma bombardir olmaq hədəfi qoymamışam. Amma hər oyunda maksimum qol vurmaq və məhsuldar ötürmə ilə yadda qalıb "Səbail"ə faydalı olmaq istəyirəm.

- Azərbaycan futbolu haqqında ilkin təəssüratların necədi?
- Azərbaycan futbolunda inkişaf görünür. Ən azı "Qarabağ"ın avrokuboklarda uğurlu çıxışı buna sübutdur. Çempionatınıza gəlincə, temp yüksəkdi və taktiki planda da komandalar pis təsir bağışlamırlar. Sadaladıqlarım xoşuma gəlir. Ümumi götürəndə  futbolunuzu yaxşı qiymətləndirirəm.