Sport24.az
"Təbii ki, komandanın I Liqaya düşməsinə təəssüflənirəm". Bu sözləri Sport24.az-a "Səbail"in futbolçusu Cabir Əmirli deyib.
28 yaşlı cinah müdafiəçisi Bakı təmsilçisinin Azərbaycan Premyer Liqası ilə vidalaşması ilə bağlı fikirlərini bölüşüb:
"İdmanda enişlər və uğurlu dövrlər də olur. "Səbail" nisbətən gənc klub olsa da, avrokuboklarda oynamağa imkan da tapmışdı. İki mövsüm öncə də düşmə zonasında idik. Amma sonra çempionatda qalmağı bacardıq. Bu dəfə alınmamasına üzülürük".
O, mövsümün böyük hissəsini zədə səbəbindən buraxması barədə danışıb: "Kluba meydanda kömək edə bilməsəm də, mövsüm ərzində komanda yoldaşlarımın yanında olmuşam, dəstəyimi əsirgəməmişəm".
Futbolçu gələcək karyerası barədə bunları söyləyib:
"Hazırda bərpa prosesini yekunlaşdırıb aktiv məşqlərə başlamışam. Bəzi klublardan maraq var. Təklifləri dəyərləndirmək üçün vaxtımın olduğunu düşünürəm. Zədə məni geri salsa da, döyüşkən ruhluyam. Hansı komandada oynayacağımdan asılı olmayaraq meydanda tam gücümü ortaya qoyacağam".
Əmirli "Səbail"də qalmaq ehtimalı barədə də fikirləini bölüşüb: "Son dörd mövsümü bu komandada oynamışam. Artıq mənim üçün doğmalaşıb. Təbii ki, uyğun təklif olsa, müzakirə etməyə hazıram. Mənim üçün əsas olan daimi oyun praktikasıdır".
