SCALE layihəsi çərçivəsində beynəlxalq görüş baş tutdu

Azərbaycan nümayəndə heyəti Rumıniyanın paytaxtı Buxarest şəhərində keçirilən SCALE layihəsi çərçivəsində beynəlxalq görüşdə iştirak edib. Sport24.az xəbər verir ki, Rumıniyanın paytaxtı Buxarestdə SCALE layihəsi çərçivəsində Beynəlxalq Tərəfdaşlar Görüşü keçirilib.

Rumıniya Futbol Federasiyasının qərargahında təşkil olunan tədbirdə Azərbaycanı layihə üzrə koordinator Kifayət Mustafayeva, təlimçilər Gülyana Özcan və Ofeliya Qafarova təmsil ediblər. Onlar layihənin Azərbaycanda uğurla icrası, meydança fəaliyyətləri və "ikili karyera" üzrə məktəb proqramlarının tətbiqi ilə bağlı təqdimatlar ediblər.

İki gün davam edən görüş zamanı tərəfdaş ölkələr - Azərbaycan, Rumıniya, İtaliya, Moldova və Malta arasında layihə üzrə cari vəziyyət və gələcək planlar müzakirə olunub. Xüsusilə metodologiyanın tətbiqi, qiymətləndirmə sorğuları, nəticələrin təhlili, SCALE metodologiyası üzrə rəylərin toplanması və layihənin yekun təşkilatı işləri ilə bağlı vacib qərarlar qəbul olunub.

Tədbir, həmçinin layihə üzrə turnirlərin və yekun konfransın planlaşdırılması baxımından önəmli mərhələ olub. SCALE layihəsi gənc futbolçuların idmanla yanaşı, akademik fəaliyyətlərini dəstəkləyən "ikili karyera" modelinin inkişafını hədəfləyir. Layihə 2023-cü ildən etibarən AFFA-nın təşkilatçılığı ilə 10 məktəb və 5 klubu (oğlan və qız futbolçular daxil olmaqla) əhatə edir.