"Sassuolo" 10 nəfərlə "Atalanta"nı məğlub etdi, "Milan" "Kremoneze"ni son dəqiqələrdə sındırdı

İtaliya A Seriyasının 27-ci turu çərçivəsində keçirilən "Sassuolo" - "Atalanta" matçı meydan sahiblərinin 2:1 hesablı sürpriz qələbəsi ilə başa çatıb.

İdman.Biz xəbər verir ki, oyunun hələ 16-cı dəqiqəsində "Sassuolo"nun hücumçusu Andrea Pinamonti birbaşa qırmızı vərəqə alaraq meydandan qovulub. Azlıqda qalan meydan sahibləri buna baxmayaraq, 23-cü dəqiqədə İsmayıl Konenin qolu ilə hesabı açıblar.

İkinci hissədə üstünlüyünü artıran "qara-yaşıllar" 69-cı dəqiqədə Kristian Torstvedtin vurduğu qolla fərqi ikiyə çatdırıblar. Görüşün sonlarında, 89-cu dəqiqədə Yunus Musa "Atalanta"nın yeganə qoluna imza atsa da, bu, bərabərlik üçün kifayət etməyib.

Bu nəticədən sonra xallarını 38-ə çatdıran "Sassuolo" turnir cədvəlində səkkizinci pilləyə yüksəlib. 45 xalı olan "Atalanta" isə yeddinci sırada qərarlaşıb.

17:36

İtaliya A Seriyasının 27-ci turu çərçivəsində keçirilən "Kremoneze" - "Milan" matçı qonaqların çətin qələbəsi ilə başa çatıb.

İdman.Biz xəbər verir ki, oyunun taleyi yalnız son dəqiqələrdə həll olunub. Görüşün 90-cı dəqiqəsində müdafiəçi Strahinya Pavloviç hesabı açıb.

Meydan sahiblərinin bərabərlik qolu üçün irəli atıldığı vaxtda - 90+4-cü dəqiqədə "Milan" əks-hücumda ikinciqolu vurub. Sonradan meydana daxil olan Kristofer Nkunku ötürməsi ilə portuqaliyalı ulduz Rafael Leaunu qapıçı ilə üz-üzə qoyub və o, son nöqtəni qoyub - 2:0.

Bu qələbədən sonra "Milan" 57 xalla turnir cədvəlinin ikinci pilləsində qərarlaşıb. Lider "İnter"lə xal fərqi 10-dur. "Kremoneze" isə 24 xalla 17-ci sırada yer alıb.