Sport24.az
Azərbaycan Premyer Liqasının I turunun "Sumqayıt" – "Kəpəz" oyunundan (3:0) sonra meydan sahibi komandanın baş məşqçisi Saşa İliç jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…
– İlk ev oyununda qələbə qazandığımız üçün sevincliyik. İlk hissədə yaxşı oynadıq, amma fasilədən sonra problemlər oldu.
– Hücum futbolu oynadınız. Bu fəlsəfəni davam etdirəcəksiniz?
– Hər oyunda belə olmasını istərdim. Amma reallıq var. "Qarabağ", "Neftçi" kimi komandalara qarşı belə oynaya bilmərik. Belə oynasaq, bizi cəzalandırarlar. Bugünkü matçda ikinci hissədə problemlər yaşadıq. Bunları nəzərə alıb, məşqlərdə aradan qaldırmağa çalışacağıq.
– İkinci hissədə rahatlıq yaxşı oyuna əngəl oldu, ya fiziki çatdırmadınız?
– Fiziki problem olduğuna inanmıram. Çünki bir neçə əvəzetmə etdik və yeni oyunçular qoşuldu. Fərdi səhvlər var idi. Bəzi oyunçular səhv etdi. 3:0 olanda daha rahat, sadə oynamalısan. Bəzi oyunçular bunu dərk etmədi. Bəziləri fərdi mübarizələrdə səhvlər etdi, iki sarı vərəqə aldıq.
– Sonradan meydana daxil olan oyunçuların yaxşı qoşulmamasının təsiri oldu?
– Problem səhvlərdə idi. Bəzi oyunçulara vaxt lazımdır. Futbolçuları yoxlamaq üçün əvəzetmələr edirik. Əsas problem sadə oynamamağımız idi. Oyunçular riskli duellərə girdi.
– Növbəti tur "Qarabağ"la oynayacaqsınız. Onlar da sizdən öncə Macarıstanda "Ferentsvaroş"la qarşılaşacaqlar. Bu, sizin üçün üstünlükdür?
– "Qarabağ" Azərbaycanın ən güclü komandadır. Onların oyunlarını daim izləmişəm. "Ferentsvaroş"la oyun onlarçün çətin olacaq. Amma bunun bizə hansı üstünlüyü qazandıracağını bilmirəm. Oyuna taktiki fikir verməliyik. Bugünkü kimi səhvlər etsək, bizimçün yaxşı bitməyəcək.
– Burda olduğunuz müddətdə azərbaycanlı futbolçuların mentalitetini dəyişə bilmişiniz? Ayxan Süleymanlı hücumun gedişində arxaya oynadı, iki dəfə səhv etdi və sonra onu əvəzlədiniz…
– Ayxanı bəyənirəm. Azərbaycanın U-21 yığmasının üzvüdür. İkinci hissədə bəzi səhvlər etdi. Onunla söhbətim oldu. Gələcəkdə çox oynamaq istəyirsə, bu səhvləri etməməlidir.
