Santuşun yubileyinə ruhsuz millinin “hədiyyə”si

RƏŞAD QASIMOV

İki ardıcıl məğlubiyyətdən sonra millinin nəhayət ki, azarkeşləri sevindirəcəyinə ümidlər böyük idi. Estoniya ilə oyundan əvvəl fikirlərini öyrəndiyimiz əksər mütəxəsiislər, futbol adamları Fernandu Santuşun çalışdırdığı komandanın Tallindən qələbə ilə dönəcəyini, ən pis halda heç-heçə edəcəyini söyləyirdi. Təəssüf ki, ölkənin əsas komandası növbəti dəfə bizə xəyal qırıqlığı yaşatdı, dünən gecə ekran qarşısında əyləşənlərin əsəbləri ilə oynadı...

Ola bilər kimlərsə millinin Estoniyada uduzmasına baxmayaraq, yaxşı oynadığını düşünür. Dirəkdən dönən topu, Ramil Şeydayev və Elvin Cəfərquliyevin real qol şanslarından istifadə edə bilməməsini göz önünə gətirib, yenilgiyə əsas kimi bəxtimizin gətirmədiyini fikirləşir. Xeyr əzizlərim, yığma nə yaxşı oyun nümayiş etdirdi, nə də Tallindən sərfəli nəticə ilə geri döndü. Dünən Estoniya paytaxtında 30 ildi izlədiyimiz ssenarinin təkrarını gördük. Başıpozuq hücumlar, müdafiədə kobud səhvlər və ən əsası ruhsuz kollektiv...

Meydan sahiblərinin rahat oyunu fonunda, bizimkilər çox həyacanlı idilər. Məhz bu həyacan və tələskənlik axırımza çıxdı. Millidə psixoloji problemin olduğunu görmək üçün eynək taxmağa da ehtiyac yoxdu. Hər şey açıq-aşkar görünür. Xətlərarası əlaqə demək olar ki, sıfırın altındadı. Və ən əsası kollektivdə lider problemi var. Komanda hesabda geri düşərkən heç bir futbolçumuzun məsuliyyəti üzərinə götürməyə, komandanı arxasınca aparmağa cəsarəti çatmadı. Bu gün bizim əsas problemimiz budu. Lidersiz və ruhsuz yığma...

Santuşa gəlincə, onu "ağ atlı qəhrəman" kimi Azərbaycana dəvət edənlər də artıq başa düşürlər ki, keyfiyyətli material olmadan kimi gətirirsən, gətir, nəticə dəyişməyəcək. Bunu artıq Estoniya ilə oyundan öncə 70 yaşını qeyd edən portuqaliyalı da anlamağa başlayıb. Millinin baş məşqçisi kimi işə başlamamışdan öncə nikbin fikirlər səsləndirən portuqaliyalı geridə qalan 3 matçdan sonra minor notlar üzrəində danışmağa başlayıb. Doğum günündən söz düşmüşkən, bəlkə də Fernanduya həyatıboyu əlamətdar gündə bundan eybəcər "hədiyyə" edən olmamışdı.