Sport24.az
RƏŞAD QASIMOV
Fernandu Santuşun rəhbərlik etdiyi milli Millətlər Liqasının D divizionunun bir addımlığındadı. Nəzəri cəhətdən yığmanın C liqasında yerini qorumaq şansı qalsa da, çətin ki, bunu bacaracaq. Hindistan millisinin hokkeydə dünya çempionu olacağı daha real görünür, nəinki Estoniyanın qapısına yol tapa bilməyən yığmanın 2 gün sonra səfərdə İsveçi məğlub edəcəyi...
Millətlər Liqsının seçmə mərhələsindən öncə demək olar hamı 2 görüşdə millinin Estoniyadan 6 xal götürəcəyinə inanırdı. Ən bədbin azarkeş, mütəxəssis, idman yazarı belə ən pis halda 4 xalın "cibimizdə" olduğunu düşünürdü. Turnirin startı ərəfəsində Portuqaliya ilə Avropa çempionu olmuş məşqçinin komandanın "sükanı arxasına" dəvət olunması, millidə "ulduz" nəslin formalaşması, AFFA-da rəhbər dəyişikliyi belə düşünməyə əsas verirdi. Heç kim inanmazdı ki, seçmə mərhələnin sonunda C divizionuna düşməmək üçün mümkün, qeyri-mümkün varinatları gözdən keçirmək məcburiyyətində qalacağıq.
Bəlkə də dünən keçirilən oyundan sonra bəziləri ölkənin əsas komandasının rəqibdən üstün oyun sərgilədiyini, qələbəyə layiq olduğunu düşünür. Ancaq fakt faktlığında qalır, əvvəlki 5 matçda qeydə alınan nəticlər bizi qitə futbolunun zirzəmisinə aparır. Hər seçmə mərhələdən öncə nikbin olmağa çalışırıq, yığmanın bizi sevindirəcəyinə ümid edirik. Təəssüf ki, il-ildən pis gəlir, böyük sürətlə üzüaşağı gedirik, hamının qapazaltısına çevrilirik. Artıq rəqiblər bizimlə eyni qrupda yer aldıqlarına görə sevinirlər, xal planlaşdırmasında bizə potensial "6 xal" gözü ilə baxırlar.
Millinin başına keçən hər yeni baş məşqçi bizə yeni ümid gətirir. İşıqlı sabahdan, xoş gələcəkdən danışırıq, özümüz-özümüzü aldatmağa, şirin yalanlara inandırmağa çalışırıq. Çox maraqlıdı ki, "sükan arxasına" keçən hər yeni əcnəbi mütəxəssis də sanki xalq olaraq nağılı çox sevdiyimizi hiss edir. Elə bil bilirlər ki, biz cırtdanın təpəgözü aldatmasına, Məlikməmmədin ona pislik edən qardaşlarına humanist yanaşmasına uşaqlıqdan inanırıq. Bu səbəbdən gələn bizə nağıl danışmağı xoşlayır. Cənab Santuş da eyni yolla gedir. Berti Foqtsun, Nikola Yurçeviçin, Canni de Byazinin şirin nağıllarının davamını o söyləyir və 2028-ci ildə Avropa çempionatına yollanacaq komanda quracağından dəm vurur. Hamımız – jurnalistlər, azarkeşlər, hətta AFFA rəhbərliyi bilir və başa düşür ki, belə yanaşma ilə bu qeyri-mümkün görünür. Ancaq özümüzü bu şirin nağıla inandırmağa çalışırıq və belədə günləri həftələrə, həftəni aylara, ayları isə illərə calayırıq.
Nağıl dinləyə-dinləyə isə futbolumuzun canını tapşırmasına şahidlik edirik.
