Sport24.az
CEYHUN ƏLİYEV
"Dəlidən doğru xəbər" - bir qədər kobud ifadə olsa da, zərbi- məsəldi. Millimiz sabah Millətlər Liqasında həlledici oyununa çıxacaq. Fernandu Santuş da bu taleyüklü görüşlərə ilk 4 matçda bel bağladığı Mehdi Cənnətovu çağırmayıb. Həmin Mehdini ki, millidə məhz Santuşun kəşfi saymaq olar. Tək İsveçlə Bakıdakı matçı xatırlamaq yetər ki, portuqaliyalının dağıstanlı qolkiperin ölənlərinə dua oxutdurmağa borclu olmasını iddia edək. İnsafən, 70 yaşlı mütəxəssis də hər görüşdən sonra əlcək sahibinin ünvanına ən xoş sözləri deyirdi. Və budur, Mehdi millidən kənar saxlanıldı. Bəli-bəli, qalmadı, saxlanıldı.
Nəyə əsasən belə iddia irəli sürürəm? Bir sıra faktları ortaya qoyacam ki, məsələyə tam aydınlıq gəlsin.
Ölkə xaricindən azərbaycanlı "əlcək sahibi" dəvət almır ki, sərhəddən o yana boylanaq. Deməli, ümid qalır sınıq-salxaq çempionatımızda çıxış edən komandalara. Və aydın olur ki, bu kollektivlərin yarısının qapıçısı əcnəbidi, birində isə rotasiya formasında yerli və legioner qolkiperə güvənilir. Beləliklə, əsas qapıçı statuslu Azərbaycan pasportuna sahib olan "əlcək sahibləri"nin siyahısına nəzər salaq: Anar Bayramov, Nicat Mehbalıyev, Rza Cəfərov, Mehdi Cənnətov, Hüseynəli Quliyev.
Adlarını çəkdiyimiz qapıçılardan son ikisi Santuşun siyahısından kənar qalıb. Yenə də deyirəm, söhbət millidə bütün oyunlarda güvənilən kəsdən gedir. Portuqaliyalının son oyunlarda "Sumqayıt"ın qolkiperinin formada olmadığını iddia etməsi isə bir başqa dərddi. Zalımın balası, adam "kak raz" elə son oyunlarda özünə gəlib də. Cənnətov son 3 matçda cəmi 1 qol buraxıb e!
Belədə, istər-istəməz İlqar Qurbanobun məşhur ifadəsi yada düşür: "Əvvəllər futbolçular tapşırıqla çağırılırdı, indi isə yox". Həqiqətən Santuşun sözləri ilə "əməlli başlı uzlaşır".
P.S. Şəxsən mən qapıda azərbaycanlı balasının dayanmasını arzulayıram, Cənnətovun da çağırılmamasına sevinirəm. Ancaq göstərilən səbəb fərqli şeylərdən xəbər verir, cənablar, fərqli şeylərdən.
P.P.S. Çempionatın son 3 turunda yalnız Rza və Mehdi bütün görüşlərdə əvvəldən axıradək meydanda olub. Bu oyunlarda Cəfərov 3 dəfə məyus olub. Digər iki qapıçıya gəlincə, onların hər ikisi 2 matçda forma şansı qazanıb. Mehbalıyev qapısında 1, Bayramov isə 4 qol görüb.
