Santuşun “kəşf”i naminə… 3 tuş!

TƏRLAN ABBASZADƏ

Azərbaycan millisi baş məşqçi Fernandu Santuşun rəhbərliyi altında növbəti dəfə qələbəyə həsrət qaldı. Yoldaşlıq oyunu olsa da, ötən gün Haitiyə üç cavabsız qolla məğlub olduq. Bu tip matçlarda nəticə elə də önəmli olmasa da, meydanda sərgilənən oyun da futbol ictimaiyyətini razı sala bilməzdi. 

Portuqaliyalı mütəxəssis hələ dünən anlayıb ki, futbolçularımız "1-ci nömrə"ylə oynaya bilmir?! Hələ müdafiəyə üstünlük verib, əks-hücuma çıxmağın daha yaxşı olacağını da qabartdı. Halbuki millimiz müdafiə futbolu da oynamağı bacarmır. Bunun da bariz nümunəsi standart vəziyyətdən buraxılan qoldur. Ümumiyyətlə bu, Azərbaycan futbolunun problemlərindən birincisidir desək, yanılmarıq. Elə məhz bu mövsüm "Qarabağ" Avropa Liqasında Rumıniyanın FCSB klubu ilə oyunda hər üç qolu künc zərbəsindən buraxdı.

Cənab Santuş, UEFA Millətlər Liqasında 6 qarşılaşmada bu yığmanın "sükanı arxası"nda olmusan. Həmin məğlubiyyətlərdən bir az da olsun dərs çıxarmamısan? Hücum futbolu oynaya bilməyəcəyimizi görmək üçün Haitidən üç qol buraxmaq lazımdır? Olmazdımı həmin qarşılaşmada bir neçə gənc oyunçu start heyətində meydana çıxardı?! Qollar buraxandan sonra onların motivasiyasını yüksəltmək isə olduqca çətindir. 

Təyinatdan sonra da dəfələrlə portuqaliyalı mütəxəssisin bizə uyğun olmadığı deyilib, yazılıb. Bu, nə qədər səhv qərar olsa da, bir yolunu tapıb onunla vidalaşmaq lazımdır. Yığmanı yerli, azərbaycanlı, bizim mentaliteti bilən baş məşqçiyə tapşırmaq daha məqsədəuyğun olar. Millətlər Liqasına D Liqasına da düşmüşük, bu oyunla, bu heyətlə seçmə mərhələdə də heç nəyə ümid etmirik. Gələcəyin komandasını qururuqsa, buna baş məşqçidən başlamaq lazımdır...

Necə ki, U-21-də perspektivli Ayxan Abbasov işləyir və komanda dünən yoldaşlıq görüşündə Moldovanı 2:0 hesabı ilə məğlub etdi. Abbasovun bu kollektivlə daha da uğurlu nəticələr əldə etməsi, Santuşun gedişini də sürətləndirəcək. Ancaq Santuşu başqa bir Sanruş əvəzləyəcəksə, elə Santuşla davam etmək yaxşıdı.

Yazını atalardan qalma bir kəlamla bitirək: "Hər işdə bir xeyir var". Biz də bu məğlubiyyətdə xeyir görək. Məsələn, Fernandu müəllimin futbolçularımızın hücum futbolu oynamağı bacarmamasını görmək üçün Haitidən 3 qol buraxmağa dəyərdi…