Sport24.az
Azərbaycan millisinin baş məşqçisi Fernandu Santuş sabah Latviyaya qarşı keçiriləcək yoldaşlıq oyunundan öncə təşkil olunan mətbuat konfransında iştirak edib. Sport24.az xəbər verir ki, yarımmüdafiəçi media nümayəndələri ilə görüşdə bunları deyib:
– Toplanışın əvvəlindən bu günə qədər oyunçular özlərini yaxşı göstərməyi bacarıblar. Dərk edirlər ki, mənim onlardan tələblərim nədir. Emin Mahmudovun da dediyi kimi, komanda yaxşı hazırlaşıb və matça köklənmişik. Əlbəttə, bilirik, çətin oyun olacaq. Hər iki komanda qələbə üçün çalışacaq. Latviya yığmasının da yaxşı, keyfiyyətli oyunçuları var. Bu günlər ərzində komandaya tapşırıqları, rəqib haqda məlumatları vermişəm. Düşünürəm ki, oyun haqda hamı kifayət qədər məlumatlıdır. Əlimizdən gələnin ən yaxşısını meydanda göstərməyə çalışacağıq.
– Heyəti dəqiqləşdirmisiniz? Bu matçlar dünya çempionatının seçmə mərhələ oyunları üçün nə dərəcə heyəti müəyyləşdirməyə kömək olacaq?
– İndiki durumda diqqətimiz Latviya ilə matçdadır və heyətimiz buna uyğun olacaq. Hər komandanın oyun üslubu var. İstər İslandiya, istər Ukrayna, istərsə də Fransa. Hər birinin öz oyun anlayışı var. Ümumi götürəndə, bu günə qədər milliyə 30-a yaxın futbolçu dəvət olunub. Bəzi dəyişikliklər olacaq, yeni futbolçular cəlb oluna bilər. Hər şey ola bilər.
– Mövsümün sonudur. Futbolçularda yorğunluq və psixoloji olaraq istirahət fikirləri var. Bunlar köklənməyə nə dərəcə təsir edəcək?
– Hamı çox istəklidir. Bəzi futbolçular bir məşqlə kifayətləniblər. Ümumi durum yaxşıdır. Kubokun finalından sonra milliyə qatılanlar çox məşq etməyib. Taktiki məşqlər üzərində çalışmışıq. Dünən bərpa məşqi keçdik. Bugünkü məşqlə də sabahkı oyuna hazırlaşacağıq. Oyunçuların yorğunluğu oyuna təsir etməməlidir. Latviya millisinin oyunçularının yerli liqalarda oyunları davam edir. Sabahkı oyun üçün uşaqlar çox motivasiyalıdır.
– Mahir Emreli klub axtarışındadır. Təcrübəli mütəxəssis kimi onunla hansısa söhbətiniz olubmu?
– Son toplanışda da Mahirlə danışmışam. O, son matçlarda özünü yaxşı göstərib və istəklidir. Onunla söhbətlərimiz olur. İndiki məqamda yaxşı komanda tapması vacibdir. O, yaxşı potensiala malikdir.
– Bədavi Hüseynov zədələndiyi üçün heyətdən çıxarıldı, amma yerinə kimsə dəvət olmadı. Onu əvəzləyəcək daha səviyyəli müdafiəçi olmadı?
– Həmin mövqeyə çox oyunçu çağırılıb. Ona görə kiminsə sonradan dəvət olunmasına ehtiyac görmədim.
– Kapitan və penalti vuran məlumdur?
– Emin start heyətdə yer alsa, kapitan da, penaltini vuran da o olacaq.
