Idman.biz
21 yaşadək futbolçulardan ibarət Azərbaycan millisinin sabiq baş məşqçisi Samir Əliyevin AZƏRTAC-a müsahibəsi
- Azərbaycan millisi ötən gün DÇ-2026-nın seçmə mərhələsinin II turunda doğma meydanda Ukrayna ilə 1:1 hesablı heç-heçə etdi. Oyun haqqında fikirləriniz maraqlıdır...
- Futbolçuların meydanın hər qarşı uğrunda mübarizə aparması sonda Azərbaycan millisinə 1 xal qazandırdı. Uşaqlar əzmkar çıxış edirdilər. Yığmanı təbrik edirəm.
- Bir çoxları Azərbaycan millisinin futbolçularının Fernandu Santuşun rəhbərliyi altında milli ruhda oynamadığını iddia edirdilər. Sizin buna münasibətiniz necədir?
- Fernandu Santuşun istefasından sonra AFFA rəhbərliyinin qısa müddətdə millinin Ukrayna ilə çətin oyununu Ayxan Abbasova tapşırması son illərdə verilmiş ən düzgün qərarlardan biri oldu. Yığmanın son nəticələri, xüsusən də İslandiya qarşı mübarizəsiz böyükhesablı məğlubiyyət bu qərarın nə qədər zəruri olduğunu göstərirdi. Futbolda uduzmaq olar, lakin mübarizə aparmadan yox. Ayxan Abbasovun isə Rüstəm Əhmədzadə ilə Abdulla Xaybullayevi milli komandaya dəvət etməsi və onlara əsas heyətdə güvənməsi həmin futbolçular üçün böyük motivasiya oldu.
- AFFA bundan sonra baş məşqçi məsələsi ilə bağlı hansı addımı atmalıdır?
- Dünənki oyun göstərdi ki, yığma bu futbolçularla yerli məşqçiyə həvalə olunmalıdır.
- Yığmanın seçmə mərhələsinin bundan sonrakı oyunlarda neçə xal yığacağını təxmin edirsiniz?
- Çətin qrupa düşdüyümüz hər kəsə məlumdur. Amma dünənki oyun göstərdi ki, bu istək və motivasiya ilə mübarizə aparsaq, İslandiyaya qarşı ev oyununda xal və ya xallar qazanmaq mümkündür. Fransa və Ukrayna ilə səfərdə isə daha ağır qarşılaşmalar gözləyir. Xüsusilə də Ukrayna dünənki heç-heçədən sonra cavab qarşılaşmasına tam fərqli motivasiya ilə çıxacaq.
- Vaxtilə işlədiyiniz U-21 millisi Avropa çempionatının seçmə mərhələsi çərçivəsində evdə Bolqarıstanla qollu heç-heçə (1:1) etdi. Komandanın gələcək prespektivini necə görürsünüz?
- Ötən gün U-21 millimiz də evdə ilk qolunu və ilk xalını qazandı. Qarşıda çətin oyunlar var, amma ümid edirəm ki, bu seçmə mərhələ milli üçün uğurlu olacaq. Ən önəmlisi isə odur ki, A milli komandaya yeni futbolçular cəlb olunacaq. U-21-də perspektivi və gələcəyi olan bir neçə oyunçumuz var.
İdman.biz
