Idman.biz
Azərbaycan millisinin sabiq hücumçusu Samir Əliyevin futbolinfo.az saytına müsahibəsi
- Yığmamız DÇ-2026-nın seçmə mərhələsində ilk oyununu sentyabrın 5-də səfərdə İslandiyaya qarşı keçirəcək. Millimiz bu görüşdə yaxşı nəticəyə imza ata bilər?
- Bu yaxınlarda yığmamızın qapıçısı Şahrudin Məhəmmədəliyevin müsahibəsini oxudum, doğru olub-olmadığını bilmirəm. Ancaq dediyinə görə, əvvəl futbolçular milliyə daha istəkli gəlirdilər. Bu baxımdan, yığma üzvlərinin motivasiyasının hansı səviyyədə olması oyunda görünəcək. Ümid edirəm ki, Fernandu Santuş komandanı bu görüşə yaxşı hazırlaya və gözəl oyunla bizləri sevindirə biləcək.
İslandiya ilə qarşılaşmadan 4 gün sonra Bakıda Ukrayna yığmasını qəbul edəcəyik. Bu görüşdə şansları necə dəyərləndirirsiniz?
Ukrayna millisi Fransa ilə birlikdə qrupun favoriti hesab edilir və güclü heyətə malikdir. Ümid edək ki, hər seçmə mərhələdə olduğu kimi, bu dəfə də sensasiyaya imza ata biləcəyik.
- İslandiya və Ukrayna ilə matçlarda millimizin heyətində kimdən və ya kimlərdən qol gözləyirsiniz?
- Reallıq odur ki, bu gün millinin heyətinə dəvət edilən futbolçuların arasında klublarında oyun praktikası olanlar və olmayanlar var. Bir neçə mövqe var ki, orada ciddi problemlər mövcuddur. Kimin oynayıb-oynamayacağını Santuşdan başqa kimsə bilmir. Bu baxımdan, kimin qol vura biləcəyini söyləmək çətindir. Hücum xəttində yer alan futbolçulardan da qol gözləmək olar, standart vəziyyətlər zamanı müdafiəçilərimizdən də.
- Ümumilikdə, yığmamızın DÇ-2026-nın seçmə mərhələsini neçə xalla bitirəcəyini ehtimal edirsiniz?
- Qeyd etdiyim kimi, tarixə nəzər salsaq, görərik ki, hər seçmə mərhələdə qalib gəldiyimiz oyunlar olub. Bu, 1996-cı ildən tutmuş bu vaxta qədər davam edib. Bu müddətdə İsveçrə, Serbiya, Norveç, Finlandiya və s. ölkələrə qalib gəlmişik. Bu seçmə mərhələdə də hansısa komandaya qalib gəlməyimiz mümkündür.
- "Qarabağ"ın Çempionlar Liqasındakı rəqibləri haqda hansı fikirdəsiniz? Sizcə, çempionumuz növbəti mərhələyə adlayacaq 24 komandanın sırasına düşə və yeni tarix yaza biləcək?
- Çempionlar Liqası tamam başqa səviyyədir və orada zəif rəqib yoxdur. "Qarabağ" üçün Liqa mərhələsində çətin olacaq. Bununla belə, çempionumuzun öz oyunu ilə azarkeşləri sevindirəcəyinə əminəm.
İdman.biz
