Sport24.az
U-21 yığmamızın sabiq baş məşqçisi Samir Əliyevin Sport24.az-a müsahibəsi
- Samir müəllim, Misli Premyer Liqasının üçüncü dövrəsi başa çatdı. Komandaların çıxışını necə dəyərləndirirsiniz?
- Çempion demək olar bəllidir, "Qarabağ". Avrokuboklara vəsiqə qazanmağa yaxın olan klublar "Zirə", "Araz Naxçıvan" və "Turan Tovuz" komandalarıdır. Riyazi hesablamalara görə, "Sabah" və "Neftçi"nin şansları var. Məncə, bu üç komanda avrokuboklara şans qazanacaq. Baxmayaraq ki, "Turan Tovuz" son turda "Sumqayıt"a məğlub oldu. Qarşıda doqquz tur var, məncə, şansı əldən verməyəcək.
- Elitadan düşməmək üçün "Kəpəz" və "Səbail" rəqabət aparır. Hansı Komandanın Premyer Liqanı tərk edəcəyini düşünürsüz?
- Dörd dovrəli çempionatda ən əsas məhz dördüncü dövrə sayılır. Turnir cədvəlinə baxanda "Sumqayıt" son iki turdakı qələbədən sonra xal ehtiyatını artırdırdı. Futbol sürprizlərlə dolu oyundur. Gözlənilən odur ki, Premyer Liqanı "Səbail" tərk edəcək. Düzdür, qarşıda "Səbail" - "Kəpəz" matçı var. "Dənizçilər" qalib gələ bilsə, xal fərqini azaldacaq.
- Cavid Hüseynovun "Səbail"dən getməsinə münasibətiniz necədir?
- Komandanın içində olmasaq da, görünən odur ki, "Səbail"də problemlər var. Bu məsələlər komandanın növbəti oyundakı nəticələrinə təsir göstərə bilər. Cavid Hüseynov gənc, perspektivli məşqçidir. Sadəcə təzyiqə tab gətirməyib, içindəki öfkeni çıxartdı. Bundan öncə Vaqif Cavadovun "Sumqayıt"ı 11 oyundur qol vura bilmirdi, böyük təzyiqlə üzləşirdi. Amma Vaqif buna dözərək məsuliyyəti öz üzərinə götürüb son iki oyunu qələbə qazanıb turnir cədvəlində yaxşı mövqeyə gətirdi. Cavid isə öz üzərində işləyən məşqçidir. Ola bilsin "Səbail"ə gələndə bu problemləri düşünməyib. Məncə, futbol ictimaiyyəti və mətbuat ona dəstək olmalıdır. Cavidin gələcəyi var, yaxşı baş məşqçi ola bilər.
- Millimizin Belarus və Haiti yığması ilə oyunu üçün heyəti açıqlandı. Sizin üçün sürpriz adlar var idi?
- Millinin baş məşqçi Fernandu Santuş yeni futbolçulara dəvət göndərib, onları yoxlamaq istəyir. Gənc oyunçular üçün yaxşı şansdır. "Qəbələ"dən dəvət alan Şahin Şahniyarov millinin bütün aşağı yaş qruplarında oynayıb. Onun Premyer Liqa təcrübəsi var, potensiallı futbolçudur.
- Yığmamızın bu iki oyunda hansı nəticə əldə edəcəyini düşünürsünüz?
- Həmin oyunlarda qalib gəlməkdən vacib millinin futbolçularının hansı durumda olmasını izləməkdir. Bizə indiki oyunlar yox, seçmə mərhələdəki matçlar vacibdir. Yoldaşlıq oyunu həmin oyunlara hazırlıq deməkdir. Qalib gəlsək, lap yaxşı olar. Futbolçularda özünə güvən artacaq.
Nuh Tarverdiyev
