Report.az
"Neftçi" və "Qarabağ" ilk oyunda bir top fərqi ilə məğlub olsalar da, finala vəsiqə qazanmaq şansları bərabərdir.
Bunu "Report"a açıqlamasında Azərbaycanın U-21 millisinin sabiq baş məşqçisi Samir Əliyev ölkə kubokunun yarımfinal mərhələsinin ilk matçlarındakı nəticələri dəyərləndirərkən deyib.
Mütəxəssis "Qarabağ" və "Neftçi"nin şanslarını qiymətləndirib:
"Hər iki qarşılaşma gərgin mübarizə şəraitində keçdi. Komandaların hər biri adını finala yazdırmaq üçün mübarizə aparır. "Qarabağ"la "Araz-Naxçıvan"dan fərqli "Neftçi" və "Sabah" üçün avrokuboklara düşmək çox vacibdir. Çünki çempionatda istədikləri mövqelərdə deyillər. Fikrimcə, cavab oyunları daha gərgin keçəcək. Bu matçlara təyinat alan hakimlər hazırlıqlı və diqqətli olmalıdırlar. İlk oyunlarda "Neftçi"nin və "Qarabağ"ın 1 top fərqi ilə məğlub olmalarına baxmayaraq, finala vəsiqə qazanmaq şansları bərabərdir. Bu baxımdan kimin finala çıxacağını demək çətindir".
Qeyd edək ki, Azərbaycan Kubokunun yarımfinal mərhələsinin ilk oyunlarında "Araz-Naxçıvan" "Qarabağ"ı (1:0), "Sabah" isə "Neftçi"ni (2:1) məğlub edib. Komandalar arasında cavab qarşılaşmaları aprelin 23-də baş tutacaq.
