Sport24.az
U-21-in şərəfini qoruyan Samir Abdullayev Sport24.az-a müsahibə verib. Futbolçu həm Serbiyaya qarşı keçirdikləri oyunla bağlı fikirlərini bölüşüb, həm də bizi maraqlandıran başqa sualları cavablandırıb.
- Serbiyalı həmyaşıdlarınızla oyunda ən azı heç-heçə etmək üçün nə çatmadı?
- Oyuna yaxşı əhval-ruhiyədə çıxmışdıq. Məqsədimiz qələbə qazanmaq idi. Sadəcə, əlimizə düşən fürsətləri dəyərləndirə bilmədik. Son nöqtəni qoya bilsəydik, matçın gedişatı fərqli olardı...
- U-21 seçmə mərhələdə yaxşı çıxış etmir, cəmi bir qələbə qazanmısız. Bunun səbəbi nədir?
- Qrupdakı rəqiblərimizin futbolçuları bizdən daha üstün liqalarda çıxış edir və klublarında daim oynayırlar. Elə Serbiyanın U-21-nin heyətində həm öz ölkəsinin çempionatında çıxış edən, həm də xarici klubların şərəflərini qoruyan oyunçular var. Təcrübə baxımından da bizdən üstündürlər. Ustalıq səviyyəsinə görə geri qalırıq, amma istək və əzmkarlığımız çoxdu.
- Demək istəyirsən ki, U-21-in oyunçuları Premyer Liqada müntəzəm oynamamasının əziyyətini çəkir?
- Başlıca səbəblərdən biri budur. Futbolçularımız elitada nə qədər çox oynasalar, bir o qədər yaxşı formada olub yığmaya fayda verə bilərlər. Amma bu məsələdə oyunçuların özlərindən də çox şey asılıdır. Onlar güclülər dəstəsində şans qazanmaq üçün maksimum çalışmalı, məşqçilərin diqqətini cəlb etməlidirlər
- Səncə, əvvəllər tətbiq olunan limiti bərpa olunmalıdır?
- Fikirimcə, bərpa olunsa yaxşıdır.
- Bir qədər də klubun "Səbail" haqqında danışaq, komandanız qeyri- sabit çıxışıyla diqqət çəkir. Bunun səbəbi nədir?
- Tam məsuliyyətimlə deyirəm ki, bütün futbolçularımız həm məşqlərdə, həm də oyunlarda maksimum güclərini ortaya qoyurlar. Sadəcə, bir qədər bəxtimiz gətirmir. Geridə qalan 5 tura baxsaz, görərsiz ki, bütün oyunlarda meydanda döyüşüb məğlub olmuşuq. Biz ümidliyik ki, lazım olan relsə düşəcəyik. Çempionat hələ yeni başlayıb, marafon uzundu. Odur ki, qarşıdakı 31 tur ərzində əlimizdən gələnin ən yaxşısını edəcəyik ki, "Səbail" çempionatda yaxşı yerlərdə qərarlaşsın.
ABDULLA İSMAYILOĞLU
