Sport24.az
Misli Premyer Liqasının XXIII turunun "Neftçi" – "Qarabağ" oyunundan (0:1) sonra meydan sahibi komandanın baş məşqçisi Samir Abasov jurnalistlərin suallarını cavablandırıb. Sport24.az xəbər verir ki, mütəxəssis media nümayəndələri ilə görüşdə bunları deyib:
– Rəhman Hacıyevi, Ramil Şeydayevi məcburiyyətdən meydana buraxdınız?
– Dəyişikliklər həmişə uğurlu olmaya bilər. Ötən oyunda Emil Səfərovla Ramil Şeydayevi meydana buraxdıq, qollar vurdular. Bu gün isə alınmadı. Fikirləşdik ki, Ozobiç və Ağadadaş artıq çıxmalı idi. Ağadadaş aldığı zərbədən sonra ağrımağa başlamışdı. Əvəzetmələr effekt vermədi. Belə şeylər ola bilir. Ramil ötən oyunda sonradan daxil olub, qol ötürməsi etmişdi. Bu gün da hücumu gücləndirmək istədi, alınmadı. Realist olmalıyıq, Rəhman da, digərləri də düşünməlidir ki, belə oyuna çıxmaq olmaz. Komandaya kömək etmək üçün hər şeyini verməlisən.
– Sonuncu dəfə "Qarabağ" üzərindəki qələbəniz "Neftçi"yə çempionluq gətirmişdi. Maraqlıdır, 2021-ci ildəki həmin qələbədən sonra "Qarabağ"ı pis əsəbləşdirdiyinizi düşünmürsünüz?
– Oyuna yaxşı başlamışdıq. Futbolçuları matça hazırlamaq rahat idi. Başa düşürdülər ki, vacib oyundur. Fanatlar da yaxşı atmosfer yaratmışdı. Biz də bunları bilərək yaxşı oyuna başladıq. Uzun müddət idi, "Qarabağ"a qarşı belə oynamamışdıq. Biz dəyişdiyimiz oyunçular yaradıcılıqları ilə seçilmədi. Bəlkə, daha bacarıqlı oyunçular lazım idi. Rəqib azlıqda qalandan sonra bir az da rahatlaşdıq. Ümumilikdə, səhvimizdən nəticə belə oldu. Qarşıda oyunlarımız var. Bu motivasiya ilə matçlara hazırlaşacağıq.
– Rəhmanın əvəzinə Murad Məmmədovu daxil etmək olmazdı?
– Azarkeş gözüylə danışmaq lazım deyil. Ötən oyunda iki əvəzetmə qol gətirdi, bu gün alınmadı. Oyundan sonra kaş bunu edərdik, kaş onu edərdik, demək asandır.
– "Qarabağ" 11 nəfərlə oynayanda da üstün tərəf idiz. Düşünmürsünüz ki, Kevin Medinanın qırmızı vərəqə alması sizin də planınıza təsir etdi?
– Əvvəldən 11 nəfərə qarşı hazırlaşırsan. Pressinqi, rəqibin oyununu düşünürsən. Medinanın "qırmızı"sından sonra çox şey dəyişdi. Yarımmüdafiədə yaradıcı oyunçu çatışmazlığı var. Görünən odur ki, Medinanın "qırmızı"sı planımızı pozdu.
– Sanki Kadi Borgesə qarşı narazılıq var idi…
– Elə edək ki, dava-dalaş olmasın. Epizod yadımda deyil.
– Bu məğlubiyyət bundan sonrakı mərhələyə necə təsir edəcək?
– İnşallah, təsiri olmaz. Birinci hissədə etdiyimiz yaxşı şeyləri çıxarıb, üzərində durub, hazırlaşacağıq. Ən pis şeydən yaxşını çıxara bilsək, bizimçün faydalı olacaq. Komandam pis oynamır. Nəticə əldə etməyə çalışırıq və həddindən artıq istəkliyik. Hər oyun məğlub olanda psixoloji təzyiq yaranır. Komanda ətrafında istəmədiyimiz atmosfer yaranır. Bunları aradan götürmək, oyunlara hazırlaşmaq çətin idi. Ancaq son matçlar göstərir ki, düzgün yoldayıq. "Zirə" ilə oyundakı ikinci qoldan sonra skamyamızda baş verənləri görsəniz, qələbəyə necə kökləndiyimizi bilərsiniz.
– Kubokun finalında "Qarabağ"la qarşılaşa bilərsiniz. Azarkeşlərə nə deyə bilərsiniz?
– Nə deyə bilərəm? Hələ finala nə qədər var… Bəlkə, "Qarabağ" finala çıxa bilmədi? Mayın 28-də olacaq bir şeylə bağlı nə deyə bilərəm ki. Qarşıda oyunlar çoxdur. Rəqəmlərlə nələrsə etmək istəyirsiz, amma yaxşı yerə getmir. Kubokda çox çətin oyunlar olacaq. Heç kim düşünməsin ki, asandır.
– Oyundan sonra futbolçular azarkeşlərlə görüşməyə getmədi…
– Bu fanatları stadiona gətirən ardıcıl qələbələrdir. 9-cu sıradan bu yerə gəlmişik. Başa düşürük, bizdən tələblər yüksək yerlərdir. Üç qələbə azarkeşimizə böyük ümid vermişdi. Bizi üzən də budur. Meydança dolur, sənə inanıb gəlirlər, amma məyus qayıdırlar. Futbolçular da insandır. Bu dəqiqə paltardəyişmə otağında kədərli olanlar, dözməyib ağlayanlar var. Bunları başa düşmək lazımdır. Bəlkə də, fanatların yanınna getməmək ən doğrusu idi. Ümidlər qırıldı. Futboldur, dünya dağılmayıb. Yenə "Qarabağ"la oynayacağıq, inşallah, qələbə də qazanarıq.
– "Neftçi"nin avrokuboklara vəsiqə qazanmaq potensialı var? Eyni zamanda, uğursuzluq faciə sayılmayacaq?
– Komandanı götürdüyüm anda neçənci yerdə olduğu yadınızdadır? Komandaya kubok qazandırmağı çox istəyirik. Məqsədim futbolçulara bu istəyi aşılamaqdır. Hər oyuna son matç kimi çıxmaq lazımdır. Yaxşı əhvaldayıq. Bu vaxta kimi ruhsuz, istəksiz oynayırdılar. Bunu aradan qaldırmağa çalışırıq. "Neftçi"nin adına avrokuboklar yaraşır. Bir şeyə söz verirəm ki, əlimizdən gələni edəcəyik.
– Emin Mahmudov qarşıdakı oyunlarda yenidən kapitan ola bilər?
– Xeyr.
