Idman.biz
"Neftçi"nin baş məşqçisi Samir Abasov Azərbaycan Premyer Liqasının 4-cü turunda "Sabah"la qolsuz heç-heçə etdikləri görüşdən sonra mətbuat konfransında ətraflı açıqlama verib.
İdman.biz xəbər verir ki, Abasov əvvəlcə komandasının oyundakı fədakarlığını vurğulayıb:
"Futbolçularımı təşəkkür etməyə borcluyam. Çox əziyyət çəkdilər, qaçdılar, yaxşı mübarizə apardılar. "Turan Tovuz"la oyunda xal itirdik, amma bu dəfə daha yaxşı oynadıq. İtkilərimiz var idi, buna baxmayaraq, futbolçular meydanda əlindən gələni etdilər. Mən oyundan çox məmnun qaldım. Azarkeşlərimizi başa düşürəm. Hamı birinci oyunda qələbə gözləyirdi. Amma bu prosesi davam etdirəcəyik və getdikcə daha yaxşı oynayacağıq".
Baş məşqçi oyunda verilməyən penalti epizodlarını da sərt tənqid edib:
"Bəzi epizodlarda meydanda bir komanda var idi, o da "Neftçi". Hakim yaxın idi, epizodu görürdü və penalti verdi. Ancaq niyə VAR müdaxilə etdi, anlamıram. Top qapıya gedirdi, futbolçu əli ilə blok elədi. Bundan əlavə, Vargasa qarşı da kobudluq var idi. Mənim fikrimcə, ən azı bu iki epizoddan biri penalti olmalı idi. Əminliklə deyirəm ki, bizim qapımızda olsaydı, yüz faiz penalti veriləcəkdi".
Abasov transfer mövzusuna da toxunaraq hücumçu çatışmazlığını etiraf edib:
"Ən çox verilən sual hücumçu ilə bağlı olur. Çünki bu, elə mövqedir ki, orada səhvə yol vermək olmaz. Amma reallıq budur ki, istədiyimiz hücumçuları Azərbaycana gətirmək çox çətindir. Avropalı, ərəb və çinli klublar bu işdə bizə mane olurlar. Çox oyunçularla danışdıq, amma alınmadı. Hazırda azad agent statusunda olan bəzi futbolçular var. Mövsümün əvvəlində onları masaya oturtmaq çətin idi, amma indi şansımız var".
Baş məşqçi komandanın gənc oyunçularına da yüksək qiymət verib:
"Murad Xaçayev çox yaxşı oynadı. Elvin Bədəlov da meydanda özünü yaxşı tərəfdən göstərdi. Mən bütün komandanın oyunundan razıyam. Kim ehtiyatda olacaq, kim oynayacaq, bunu zaman göstərəcək. Əsas odur ki, hamısı belə formada qalsın".
Abasovdan milli komanda ilə bağlı da sual verilib. O, bu məsələdə mövqeyini gizlətməyib:
"Əlbəttə, yerli məşqçinin tərəfdarıyam. Son oyunlar göstərdi ki, futbolumuzu anlayan, reallığı bilən mütəxəssis lazımdır. Yerlilərdən kim olacaqsa, ona uğurlar arzulayıram. Mənim hazırda bütün fikrim "Neftçi" və U-21 yığmasındadır".
Sonda mütəxəssis əlavə edib ki, qarşıdakı oyunlarda əsas məqsəd nəticə ilə yanaşı, azarkeşləri sevindirəcək futbol göstərmək olacaq:
"Qol epizodlarını dəyərləndirə bilməməyin izahı məndə yoxdur. Amma komanda doğru yoldadır. Daha çox çalışıb həm oyunumuzu, həm də nəticəmizi yaxşılaşdıracağıq".
İdman.biz
