Sport24.az
"Sumqayıt"ın baş məşqçisi Samir Abasov Sport24.az-a müsahibə verib. 46 yaşlı mütəxəssis həm milli komandaların oyunlarına görə Premyer Liqada yaranan fasiləni dəyərləndirib, həm də bizi maraqlandıran başqa sualları cavablandırıb.
- Yığma komanfdaların oyunlarına görə çempionatda yararnan fasilədən istədiyiniz kimi yararlana bildiz?
- Bizə belə fasilə lazım idi. Ən azı oyunçularımı bir qədər futboldan kənar tutmaq, toparlanmaq, üzərlərində olan təzyiqi atmaq və özlərinə gəlmək üçün tənəffüs yerinə düşdü. Amma bunun nə dərəcədə faydalı olacağını qarşıdakı çempionat oyunları göstərəcək.
- Fasilə dönəmində "Araz-Naxçıvan"la yoxlama oyunu keçirdiz və böyük hesabla məğlub olduz...
- Sərəncamımızda olan futbolçular arasında oyun praktikasından əziyyət çəkənlər var. Yeni transferlərimizi oyun ab-havasına qoşmaq istəyirdik. Ona görə də fasilədən maksimum istifafə etməklə sınaq matçı keçirmək istədik. Araz-Naxçıvan"a təşəkkür edirik ki, təklifimizə müsbət yanaşdı. Məğlubiyyət mənim üçün əsas deyildi. Başlıca məqsədim oyunçuların praktika qazanması və oynaması idi.
- Yoxlama matçında yeni transferləri də iş başında gördük. Komandaya yeni qoşulan legionerlər sizi qane etdi?
- Qane olmuşuq ki, onlar burdadılar və ümumi proyektimizin bir hissəsidilər. İlk hissədən sonra yeni qoşulanlar oyun tempinə ayaqlaşa bilmədiklərini bildirdilər. Miloşun ayağı doldu, Alan tənginəfəs olmağa başladı, Nimelinin gücü tükəndi. Biz bilirdik ki, məhz belə olacaq. Demək olar, hamısı uzun müddətdi oyun təcrübəsindən məhrumdular.
- Həmişə çılğın görməyə adət etdiyimiz Samir Abasov yoldaşlıq görüşündə qeydə alınan 5:1 hesablı məğlubiyyəti çox sakit qarşıladı…
- Bəli, sakit qəbul etdik. Zatən oyun zamanı boşluqaları, çatışmazlıqları görürdük. Öz-özümüzə də deyirdik ki, bu insan bəlli məsafəyə qaça bilmirsə, biz ona necə deyək ki, qaç və ya qınamağa başlayaq. Məşqlərdə reallıqları görürük, göstəricilər qarşımızdadır. Odur ki, bilirdik ki, bəzi oyunçular hazır deyillər. Məhz onları çempionata hazır etmək, kondisiyaya çatdırmaq üçün yoldaşlıq oyununa ehtiyac duyduq. Həmin futbolçuların özlərinə də başa saldıq ki, məşq ilə oyunun fərqi budur. Saatyarımlıq məşqlərdə özlərini yaxşı hiss etsələr də, sınaq matçında vəziyyətin nə qədər fərqli olduqlarını hiss etdilər və gördülər. Odur ki, yoldaşlıq görüşündəki reallığı sakit qəbul etməliydik. Hələlik bəzi futbolçular komandanın oyun ritminə uyğunlaşmayıblar. Amma çempionat matçlarında riskə gedərək onlara şans verməklə formaya salmalıyıq.
- Son günlər adınız "Neftçi" ilə yanaşı hallanır. yayılan söz-söhbətə görə, klub rəhbərliyi Roman Qriqorçuka iki oyunluq şans verib. Söylənilənlərə inansaq, ukraynalı mütəxəssis qarşıdakı iki turda da uğur qazanmasa yola salınacaq və "sükan arxasına" sizi dəvət olunacaqsız. Bu məsələ ilə bağlı fikirlərinizi bilmək istərdik.
- Mənim kluarlarda danışılanlardan xəbərim yoxdu. "Neftçi"də baş verən proseslərdən uzağam. Nə klubda yaşananlardan xəbərim var, nə də buna ixtiyarım çatır. Bunu Roman Qriqorçuka görə yox, ümumi olaraq demək istəyirəm ki, hər bir baş məşqçiyə yeni klubda özünü doğrultmaq üçün vaxt verilməlidir. Bilmirəm adım "ağ-qaralar"la necə hallanır, kimlər bunu edir. Bilmirəm bunu necə adlandırım. Mən "Neftçi"nin içində deyiləm. Ona görə bu məsələylə bağlı nəsə deyə bilmirəm. Bu gün "Sumqayıt" da bir neçə tur ardıcıl məğlub olsa, mənim də barəmdə söz-söhbətlər başlayacaq. Bu gün hətta yaxşı formada olan və turnir cədvəlində zirvədə qərarlaşan "Turan Tovuz"da da söz-söhbət var. Bu barədə verilişlərin birində danışırdılar. Yenilgi üzü görməyən komanda barədə belə söhbətlər gəzirsə, yeni mövsümdə qalibiyyət üzünə həsrət qalan klub haqda bu cür söhbətlərin ortaya çıxmasında qeyri-adi heç nə yoxdu. Mənim "Neftçi"də dostlarım var. İstər klubun əməkdaşları, istərsə də azarkeşlər arasında xətrimi istəyənlər çoxdur. Ona görə də məhz sizin sayt vasitəsiylə bildirmək istəyirəm ki, kimlərsə adımı "Neftçi" ilə yanaşı hallandırmasın. İnsanların barəmdə yalnış fikirə düşməsini istəmirəm. Bəziləri elə başa düşər ki, təşəbbüs məndən gəlir.
