Samir Abasov futbolçularına təşəkkür etdi

Konfrans Liqasının II təsnifat mərhələsinin cavab qarşılaşması çərçivəsində baş tutan "Fehervar" (Macarıstan) – "Sumqayıt" oyunundan (0:0) sonra "kimyaçılar"ın baş məşqçisi Samir Abasov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi:

– Futbolçularıma təşəkkür edirəm. Ağır oyundan çıxdıq. Böyük ümidlərlə gəlmişdik, lakin, böyük itkilərimiz də var idi. Ümumiyyətlə, Konfrans Liqasına hazırlıqsız başladıq. İsa Sulimanın zədələnməsi, üstəlik Murad Xaçayevin də bizi pis vəziyyətdə qoyması... Çox şeyi dəyişib oyuna çıxmalı idik. Başqa variantla oyuna yanaşmalı olduğumuzu düşündük. Futbolçular gücləri çatanı etdilər. Onlara təşəkkür edirəm ki, canlarını qoydular. Artıq çempionata köklənəcəyik.

– İki oyunda da yaxşı oynasanız da, mərhələ keçə bilmədiniz. Sizi üzən nə oldu?
– Çarəsizlik, gördüyümüz şeyləri düzəldə bilməməyimiz. Futbolçular öz mövqelərində oynasaydılar, nələrsə mümkün ola bilərdi. Çətinliyimiz bunlar oldu. Çox üzülürəm. Bu püşk atılandan öncə də futbolçularıma da rəqib fərqini qoymamışdım. Düşünürdük ki, azı bir mərhələ keçərik. Təəssüflər olsun ki, mənim hər dəfə başıma gələn eyni vəziyyət təkrarlanır.

– İki matçda da dəyişiklikləri sona az qalmış etdiniz. Bu, nə ilə bağlıdır?
– Bəzi futbolçuların gücünü itirməsinə görə. Baş məşqçi kimi əmin edirəm ki, bilsəm ki, kənardan gələn nəyisə dəyişə biləcək, daha tez edərəm. Amma görürsən ki, 10-cu dəqiqədə dəyişsən də, 90-da dəyişsən də, heç nə olmayacaq. Buradakı əvəzetmələri etməkdə gecikdiyimizi düşünürsünüzsə, olsun. Amma birinci matçda da məcburiyyətdən əvəzetmələr oldu. Yeni transferimiz bir həftədir bizimlədir, artıq iki oyun keçirib.

– Turun qırılma anı nə olu?
– İlk oyuna müdafiəçimizin qırmızı vərəqə alması. Məğlubiyyət yox, sadəcə "qırmızı"ya görə. Çünki bir futbolçunun yoxluğundan sonra artıq məcbursan ki, hamını fərqli mövqedə oynadasan. Yeni transferimiz Slavko yorulmuşdu, əvəz edilməsini istəyirdi, amma kimi salaq oyuna? Konfrans Liqasına belə gəlmək olmaz. Artıq bu oyunlar bizim üçün təcrübədir. Hər oyun təcrübədir. Burada yanan, əziyyət çəkən bircə Sumqayıtın komandasıdır.

(apasport)