Sport24.az
"Araz-Naxçıvan" – "Şamaxı" matçından sonra "şirlər"in hücumçusu Belajdi Pusi Sport24.az-ın əməkdaşının suallarını cavablandırıb. Albaniyalı futbolçu son oyunla bağlı fikirlərini bildirməklə yanaşı, yeni komandası barədə də düşüncələrini bölüşüb.
- Ötən tur güclü "Sabah"dan xal aldığınız halda, sizinlə demək olar, eyni səviyyədə olan "Araz-Naxçıvan"a məğlub olduz...
- Bu futbolun reallığıdı. İstəsək də, istəməsəkdə barışmalıyıq. Təbii ki, bura məğlub olmaq üçün gəlməmişdik. Sona qədər mübarizə aparsaq da, bu gün qələbəyə və xala həsrət qaldıq. Həvəsdən düşməməli və irəli boylanmalıyıq. Çempionat uzun marafondu.
- Karyeranı Azərbaycanda davam etdirmək qərarına gəldin. Bu məsələ Ayxan Abbasov amilinin rolu oldu?
- Ayxan Abbasov savadlı və hörmətli baş məşqçidi. Onun rəhbərliyi altında "Turan Tovuz"da çıxış edəndə mütəxəssis kimi futbolçulara münasibəti, komandanı matça kökləməyi çox xoşuma gəlirdi. O, işini bilən məşqçi olmaqla yanaşı, hər bir futbolçuya fərdi yanaşmağı da yaxşı bacarır. Bu barədə çox danışıb uzunçuluq etmək istəmirəm. Qısası, Ayxan müəllimdən həm məşqdə, həm oyun zamanı, həm də futboldan kənarda çox nümunələr götürmüşəm. Odur ki, "Şamaxı"ya keçidimdə Ayxan Abbasov faktoru başlıca rol oynadı.
- Ötən mövsüm tovuzlu azarkeşlərin rəğbətini qazana bilmişdin. Necə düşünürsən, şamaxılı fanatların da sevimlisi ola biləcəksən?
- Hər oyunda özümü yaxşı tərəfdən göstərməklə şamaxılı azarkeşlərin rəğbətini qazanmağa çalışacam. Bizim kimi komandalara yerli camaatın simpatiyası və dəstəyi çox önəmlidi.
ABDULLA İSMAYILOĞLU
