Sport24.az
"Şamaxı"nın hücumçusu Abdullahi Şuaybu üç oyunluq diskvalifikasiya alıb, klub isə ümumilikdə 4500 manat cərimələnib. Sport24.az xəbər verir ki, bu barədə qərar AFFA İntizam Komitəsinin iclasında qəbul olunub.
VIII turda "Kəpəz"lə qarşılaşmanın 44-cü dəqiqəsində rəqibə qarşı təcavüzkar hərəkətinə görə birbaşa qırmızı vərəqə alan Şuaybu üç oyunluq kənarlaşdırılıb. Onun bu davranışı "Şamaxı"ya 3000 manat zərbə vurub.
Hər iki komanda - "Kəpəz" və "Şamaxı" forma uyğunluğunda yaranan problemlər səbəbindən matçın gec başlamasına görə 1500 manatlıq cərimə ilə üzləşib. Bundan əlavə, dörd futbolçusuna sarı vərəqə göstərildiyi üçün "Kəpəz" daha 700 manat ödəyəcək.
İntizam Komitəsinin qərarına əsasən, "İmişli" - "Qəbələ" oyununda beş futbolçusu xəbərdarlıq alan qonaq komanda 700 manat cərimələnib.
"Sumqayıt" - "Karvan-Yevlax" görüşü isə qonaq komandanın meydançaya gec çıxması səbəbindən gec başladığı üçün "Karvan-Yevlax" 3000 manatlıq cəza alıb.
