"Şamaxı" futbolçusu: "Ayxan Abbasovdan öyrənəcəyim çox şey var" - MÜSAHİBƏ

"Şamaxı"nın futbolçusu Rüfət Abbasovun Sport24.az-a müsahibəsi

- Misli Premyer Liqasının 30-cu turunda "Sumqayıt"ı səfərdə 2:1 hesabı ilə məğlub etdiniz. Təəssüratların necədir?

- Bizi çətin oyunun gözlədiyini bilirdik. Rəqib güclü komandadır, yaxşı oyunçuları var. Çətin qarşılaşma oldu. Görüşə yaxşı başlamadıq, sonradan toparlandıq və geridönüş edərək qələbə qazana bildik.

- Komanda birinci hissədə məğlub durumda idi. Fasilədə baş məşqçi sizə hansı tapşırıqları verdi? 

- İlk hissədə də pis oynadığımızı düşünmürəm. Qol epizodlarımız olmuşdu. Fasilədə baş məşqçi səhvlərimizi dedi. Özümüzə inanmalı olduğumuzu söylədi. Şükürlər olsun ki, lazım olan qolları vurduq və 3 xal əldə etdik. 

- Bu nəticə ilə Premyer Liqada qalmaq yolunda vacib addım atdınız. Cari mövsümdəki çıxışınızı necə dəyərləndirirsən? 

- Bəli. Bu qələbə çox vacib idi. Lakin hələ son deyil. Qarşıda altı matç var. Bunlara maksimum köklənməli və meydana çıxaraq istədiyimiz nəticələri qazanmalıyıq. 

- U-21 millimizin də üzvüsən. Ayxan Abbasov yığmanın baş məşqçisi təyin olunanda hansı hissləri keçirdin? 

- Mövsümün əvvəlində "Şamaxı"ya keçməyimdə Ayxan müəllimin böyük rolu var idi və bu komandaya məhz ona görə gəlmişdim. U-21-in baş məşqçisi təyin edilməsi mənim üçün də xoş oldu. Həm klubda, həm də millidə Ayxan Abbasovla işləmək böyük təcrübədir. Ayxan müəllimdən çox şey öyrənirəm. Düşünürəm ki, hələ də öyrənəcəyim çox şey var. 

- Səncə, növbəti mövsüm "Şamaxı"nın əsas məqsədi nə olacaq? Komandanız bir il sonra avrokuboklara iddia edə bilərmi?

- Hələlik bu barədə danışmaq istəmirəm. Dediyim kimi qarşıda bizi altı tur gözləyir. Bütün diqqətimizi 31-ci turdakı "Kəpəz"lə matça yönəltmişik. Baş məşqçinin də bizdən istəyi odur ki, yalnız növbəti oyun haqqında fikirləşək.