Idman.biz
"Zirə"dən 1,3 milyon avroya İsveçin "Malmö" klubuna transfer olunan Salifu Sumanın Offsideplus.az-a müsahibəsi
- Salam, Salifu. Necəsiniz? Haralardasınız?
- Yaxşıyam, çox sağ olun. İndi İsveçdəyəm.
- Fiziki durumunuz necədir?
- Özümü fiziki olaraq əla hiss edirəm.
- Bir müddət Fransada oynayıb, sonra "Zirə"yə keçdiniz. Bu klubda istədiklərinizə nail oldunuz?
- Tamamilə. "Zirə"dəki günlərim zəngin idi. Yaxşı komanda, yaxşı baş məşqçi və rəqabətli liqa tapdım. Burada çoxlu xoş xatirələrim var.
- "Zirə" ilə 2023-24 və 2024-25 mövsümünüzü necə dəyərləndirərdiniz?
- Həm meydanda, həm də meydandan kənar çox şey öyrəndiyim 2 mövsüm oldu. Bu klub üçün hər şeyimi verdim və birlikdə nail olduqlarımıza görə çox şadam.
- Beləliklə, "Malmö". Transfer prosesi necə baş verdi?
- Çox gərgin və pozitiv bir dönəm idi. Müzakirələr ciddi və qarşılıqlı hörmət əsasında idi. Hiss elədim ki, "Malmö" həqiqətən də məni istəyir. Onların idman layihəsinə inandım. Klublar arasında hər bir şey hörmətin saxlanılması ilə baş tutdu.
- "Malmö"nü seçməkdə əsas faktor nə oldu?
- Bu klub ambisiyalıdır, əsl Avropa tarixi var və çox peşəkar struktura malikdirlər. Kluba hədəflərinə çatmağa yardım edərək, özümün də inkişaf edəcəyimi hiss etdim.
- Sizə təklif göndərən Azərbaycan və xarici klublar var idi?
- Bəli, bəzi danışıqlar olmuşdu, lakin karyeramın bu mərhələsində fərqli liqalarda yeni çelenc axtarışında idim. Avropanın başqa klubları da mənimlə əlaqə saxlamışdı. Adlarını məxfiliyi qorumaq üçün açıqlamayacam. "Malmö" mənim üçün ən bariz seçim idi.
- Azərbaycanda hədəfləriniz nə idi? "Malmö"yə keçəndən sonra nə isə dəyişib?
- Hədəfim "Zirə"yə inkişaf etməyə, avrokuboklara vəsiqə qazanmağa və futbolçu kimi böyüməyə yardım etmək idi. "Malmö"də də hədəflərim eyni qalır, ambisiyam dəyişməyib: İnkişaf etmək, komandaya dəstək göstərmək və performansı yüksək səviyyədə saxlamaq.
- Rəşad Sadıqov mətbuat konfransında demişdi ki, "Sumanın ən uğurlu oyunu "Qarabağ"a qarşı olub". Razılaşırsınız? Sizin üçün Azərbaycanda ən yaddaqalan oyun hansı idi?
- Bu sözləri eşitmək şərəfdir. "Qarabağ"a qarşı oyun emosional idi. Lakin hər bir oyunun xüsusi bir qatqısı var. Komandamın gözləntiləri aşdığı oyunları da xatırlayıram.
- "Zirə"nin heyətində sizi izləmək zövq verirdi. Qoldan sonra rəqsiniz də başqa idi. Bəlkə bir az da həmin qol sevinci barədə danışasınız?
- Çox sağ olun, həqiqətən minnətdaram. Futbolun əyləncəsini bu formada qeyd edirəm. Rəqs mənim ölkəmdən – Qvineyadan gəlir. Bu, milli rəqsdir, qol vuranda və ya qələbə qazananda sevincimi azarkeşlərlə bölüşməyi sevirəm.
İdman.biz
