Idman.biz
"Keçən mövsüm çox da oyun şansı qazanmamışdım. Bu il daha çox oynayıb əvvəlki formama qayıtmaq istəyirəm".
İdman.biz xəbər verir ki, bu sözləri Futbolinfo.az saytına açıqlamasında "Kəpəz"in futbolçusu Şakir Seyidov deyib.
"Sabah"dan ayrılan Şakir komandaya uyğunlaşma prosesinin uğurla getdiyini bildirib: "Komandaya qoşulduğum ilk gündən hər şey yaxşıdır. Məşqçi heyəti ilə münasibətim əladır. İyulun 1-dən məşqlərə başlamışıq. Hazırlıq prosesi, çox şükür, yaxşı gedir və komandada atmosfer yaxşıdır".
Adil Şükürovla münasibətlərinin bu keçiddə mühüm rol oynadığını deyən futbolçu, "Kəpəz"in onun üçün yad olmadığını bildirib: "Qərar vermək o qədər də çətin olmadı. Adil Şükürov ilə münasibətim yaxşı olduğundan və "Kəpəz"i tanıdığımdan burada olmaq istədim".
Seyidov yeni mövsüm üçün həm fərdi, həm də komanda baxımından yaxşı nəticələrə ümid edir: "İnşallah mövsümə yaxşı başlayarıq və zədəsiz, bəlasız keçər. Məşqçi şans verdiyi müddətdə komandaya əlimdən gələn qədər kömək etməyə çalışacağam. Hər gün daha çox çalışıram".
İdman.biz
