Sport24.az
2Qarabağ"ın qapıçısı Şahruddin Məhəmmədəliyev Sport24.az-a müsahibə verib. Hazırda zədə səbəbindən kollektivdən ayrı düşən qolkiper həm komandasının avrokuboklarda çıxışından danışıb, həm də bizi maraqlandıran başqa sualları cavablandırıb.
- "Qarabağ" Çempionlar Liqasının qrupuna yüksələ bilmədi. Səncə, son addımı atmaq üçün nə çatmadı?
- Fikrimcə, qitənin ən mötəbər klub turnirində heç də zəif çıxış etmədik. Vaxt var idi biz meydanda rəqiblərə maksimum müqavimət göstərmək üçün çıxırdıq. Bu gün isə adlı-sanlı komandalar bizdən ehtiyat edir. Zaqreb "Dinamo"su sıradan bir komanda deyil. Onlar bizdən də təcrübəli, hazırlıqlıdılar. Buna baxmayaraq, hər iki oyunda biz xorvatlardan daha yaxşı oynadıq, qol imkanlarında üstün olduq. Sadəcə son nöqtəni qoya bilmədik və bunun acısını çəkdik. Xorvatlar bizdən ehtiyat edərək sıx oynayır, yaxşı müdafiə olunursa, dala-qabağa qaçmaqla pressinq tətbiq edirsə bu bizim heç də zəif olmadığımızın göstəricisidir. Eyni zamanda pley-offa qədər yaxşı mübarizə aparmışıq. Odur ki, komandamızı qınamaq yox, onunla fəxr etmək lazımdı.
- Bəlkə "Ludoqorets" ilə oyunlardan sonra komandada arxayınlıq yarandı?
- Qurban Qurbanov kimi məşqçinin olduğu yerdə belə söhbət ola bilməz. Bəlkə də bir qədər yorğunçuluq var idi. Çünki son çempionat oyununda da "Turan Tovuz"un ciddi müqavimətinə rast gəldik və yekunda məğlub olduq. İstənilən halda Zaqreb "Dinamo"su kimi güclü komandaya qarşı oynayıb mərhələdən kənar qaldıq. Bunu nəzərə almaq lazımdı. Xorvatiya təmsilçisiylə görüşlərdə yol verdiyimiz səhvlərdən nəticə çıxarmaqla Avropa Liqasının qrupunda uğur qazanmağa çalışacağıq.
- Düşərgəyə yeni qolkiper cəlb olunub. Mateuş Koxalski barədə nə deyərdin?
- Fabian Buntiçlə birgə məşq etsək də, zədəli olduğum üçün Koxalskiylə məşq etmək şansım olmayıb. Hər halda o, Polşada mövsümün ən yaxşı qapıçısı adını qazanıbsa, deməli, zəif qolkiper deyil. Eləcə də "Qarabağ"a hər yoldan ötən qapıçı gələ bilməz.
- Artıq "Qarabağ"da 3 qapıçı var. Bu səni qorxutmur?
- Rəqabətdən nə qorxmuşam, nə də qaçmışam. Yeri gələndə "Qarabağ"da adlı-sanlı qapıçılarla birgə məşq edib, heyətə düşmək rəqabət aparmışam. Rəqabətin olması mənə daim fayda verib. Amma bu dəqiqə məni düşündürən əlimdəki zədəmin tezliklə sağalmasıdı. Sağaldıqdan sonra əvvəlki formamı bərpa etmək, hətta ondan daha yaxşı olmaqdı.
- Zədən nə yerdədi?
- Yavaş-yavaş sağalır
- Kollektivlə məşqlərə nə vaxt başalaya biləcəksən?
- Əlimin tam sağalması üçün ən azı bir ay yarım vaxt lazımdı. Bu müddət keçəndən sonra məşqlərə başlayacam.
ABDULLA İSMAYILOĞLU
