Idman.biz
"Ən isti əlcəklər məndə idi".
İdman.biz xəbər verir ki, futbol üzrə Azərbaycan millisinin və "Qarabağ"ın qapıçısı Şahruddin Məhəmmədəliyev "PODKAT" layihəsində iştirak edərkən uşaqlıqda ilk dəfə qapıda dayanması ilə bağlı xatirəsini bu sözlərlə izah edib.
Bu hadisə onun 10 yaşı olanda Dağıstanda baş verib. Qapıçı əvvəlcə cinah yarımmüdafiəçisi kimi oynadığını bildirib. Lakin bir epizodda komandaya qapıçı lazım olub və məşqçi onu sırf əlcəklərinin daha isti olduğuna görə qapıya keçməyə çağırıb. Məhz bu təsadüfi qərarla tanınmış qolkiperin peşəkar karyerası başlayıb.
Məhəmmədəliyev Azərbaycanı tərk edib bir mövsüm Türkiyədə oynaması ilə bağlı da danışıb: "Artıq öhdəsindən gələ bilmirdim. Mən emosiyalarla oynayıram və bu mənim üçün çox çətin idi".
Bu gedişin səbəblərindən biri UEFA Çempionlar Liqasının təsnifat mərhələsində Polşanın "Rakov" komandasına məğlubiyyət idi. O vaxt beynəlxalq oyunlarda buraxdığı səhvlərə görə ciddi tənqidlərə məruz qalmışdı.
2023/24 mövsümünü Məhəmmədəliyev "Adana Demirspor"un heyətində keçirib və Mario Balotellinin oyundaşı olub.
O, tanınmış futbolçu ilə oynamaq təcrübəsini bu sözlərlə ifadə edib: "Əyləncəli idi". Məhəmmədəliyev Balotellinin əhvalının çox dəyişkən olduğunu deyir: "Bir gün məşqə gülərüzlə gələrək zarafatlar edirdi, növbəti gün isə aqressiv davranaraq topu qəzəblə uzağa vurub məşqi yarımçıq tərk edə bilərdi. Amma bu hal da tezliklə yenidən gülüşlərlə əvəzlənirdi".
"Tarixdə ən sevdiyim qapıçı – Lev Yaşindir". Məhəmmədəliyev bu fikirlə ən yaxşı hesab etdiyi qolkiperlərin "beşliy"ini açıqlamağa başlayıb və xüsusilə alman Manuel Noyerin adını çəkərək, onun qapıçılıq nəzəriyyəsinə böyük töhfə verdiyini və yeni oyun üslubu yaratdığını vurğulayıb.
Məhəmmədəliyev 2020-ci ildə Polşanın "Legiya" komandasına qarşı oynadıqları matçı da belə xatırlayıb: "Bu oyun deyildi, bizim üçün müharibə idi".
Bu, karyerasında ən yaddaqalan və əhəmiyyətli qarşılaşma olub. UEFA Avropa Liqasının təsnifat mərhələsi çərçivəsində həmin oyun İkinci Qarabağ müharibəsinin ilk günlərinə təsadüf edirdi. Qurban Qurbanov komandanı elə ruhlandırmışdı ki, məğlub olmaq mümkün deyildi – özü də səfərdə oynamağa baxmayaraq. Həmin yaddaqalan oyun "Qarabağ"ın 3:0 hesablı qələbəsi ilə başa çatıb.
Söhbətin sonunda Məhəmmədəliyev vurğulayıb ki, "Qarabağ"ın əsas heyətinə düşə bilmədiyi və uzun müddət ehtiyatda qaldığı dövrdə komandanı tərk etməyi düşündüyü anda Qurban Qurbanovla etdiyi bir söhbət onun baxışını dəyişib. Qapıçı "PODKAT" verilişində ölkə çempionunun baş məşqçisini belə xarakterizə edib: "Ən çox bəyəndiyim xüsusiyyəti mərdliyidir – o, sözünün arxasında durmağı bacarır!"
İdman.biz
