Idman.biz
"Fransa və Ukrayna ilə görüş göstərdi ki, bizə bizim dildə danışan insan lazımdır".
Bunu Azərbaycan millisinin qapıçısı Şahruddin Məhəmmədəliyev apasport.az-a müsahibəsində deyib.
Həmin müsahibəni təqdim edirik:
- Fransa ilə görüşdə çoxları millimizin böyükhesablı məğlubiyyətini ehtimal edirdi. Amma komanda rəqibinə 0:3 uduzdu. Səncə, xal qazanmaq real idi?
- Hansı komandaya qarşı oynayacağımızı hamımız yaxşı başa düşürdük. Əsas məqsəd sona qədər mübarizə aparmaq idi. Bu da uşaqlarda alındı. Komanda yoldaşlarım çox güc sərf etdilər. Bu oyun haqda çox danışmaq olar ki, ilk hissənin son dəqiqələrində qol buraxmasaq, necə olardı... Amma etiraf edək ki, biz Fransa millisi tam fərqli səviyyələrdəyik. Fikrimcə, bunu da hamı yaxşı başa düşür.
- Kilian Mbappe 1-ci qol zamanı komandamızın üzvlərini bir-bir keçərək qapımız istiqamətinə yaxınlaşanda, qısa zamanda zərbə vuracağını ehtimal edirdin? Yəqin ki, zərbəni dəf etmək çətin idi?
- Bəli, orada çox da nəsə fikirləşməyə ehtiyac yox idi. Ən azından topu görməyə çalışırsan və qarşıdakı saniyədə nə edəcəyini düşünürsən. Dəf edilməsi mümkün olmayan zərbə yoxdur. Amma bu zərbəni dəf etmək çox çətin idi.
- Qapıda etibarlı idin. Öz performansından razı qaldın?
- Xüsusi bir şey etmədim. Bütün uşaqlar məsuliyyəti üzərinə aldı və sona qədər mübarizə apardı. Zərbələrin qarşısını almağı bacardılar.
- Matçdan sonra Fransa millisinin qapıçısı Mayk Menyanla söhbət edirdin. Nə haqda danışırdınız?
- Menyan Yassin Benzianın yaxın dostudur. Bir az söhbət etdik. Bir-birimizə uğurlar arzulayıram. Sonda da formalarımızı dəyişdik.
- Növbəti görüşünüz Ukrayna yığmasına qarşıdır. Yorğunçuluq var? Bu matç haqda nə fikirləşirsən?
- Əlbəttə, yorğunçuluq var. Bu, normaldır. Allah qoysa, bərpa olunacağıq. Zamanımız var. Düzgün istirahət edərək, oyuna hazırlaşmalıyıq.
- Ayxan Abbasov uzun müddət postunda qalsa, bu sistemi möhkəmləndirə bilsə, səncə, milli uğur qazana biləcək?
- Fransa və Ukrayna ilə görüş göstərdi ki, bizə bizim dildə danışan insan lazımdır. Hansı ki, həmin məşqçi ölkəsinin patriotudur. Futbolumuz təəssüf ki, o səviyyələrdə deyil ki, hansısa böyük hədəflərdən danışaq. Lakin üzərimizə düşəni edəcəyik. Hər matçda sona qədər mübarizə aparacağıq.
