Sport24.az
Mövsümlərarası fasilədə "Adana Dəmirspor"dan ayrılan Şahruddin Məhəmmədəliyev yenidən "Qarabağ"a döndü. Premyer Liqanın ilk turunda, daha dəqiq desək, "Araz-Naxçıvan"la matçda iş başında olan qolkiper oyundan sonra Sport24.az-ın əməkdaşının suallarını cavablandırıb. Millinin də formasını geyinən qolkiper həm geri qayıdışından danışıb, həm də qarşısına qoyduğu məqsəddən söhbət açıb.
- Azərbaycana qayıdışınla bağlı fikirlərin maraqlıdı...
- Geri dönməyimdə qeyri-adi heç nə yoxdu. Mənə doğma olan ölkəyə və kluba qayıtmışam. Bir ay idi ki, məşqsiz idim. Artıq 2 həftədi "Qarabağ"dayam və intensiv hazırlıq keçməklə formamı bərpa etməyə çalışıram. Düşünürəm ki, oyundan-oyuna əvvəlki formamı bərpa edəcəm. Ümumi götürəndə vəziyyət yaxşıdı.
- Necə düşünürsən, "Adana Dəmirspor"a keçidin səhv addım idi, yoxsa düz?
- Həmin an üçün düzgün qərar verdiyimi düşünürəm. Türkiyədə yaşadığım legioner həyatı da mənə çox şey öyrətdi. Necə deyərlər, bir qədər də müdrikləşdim.
- Türkiyədə qalmağı və ya başqa ölkədə legioner həyatı yaşamağı özün istəmədin, yoxsa təklif olmadı?
- Legioner həyatını davam etdirmək üçün yetəri qədər təklifim, şansım var idi. Türkiyə və Rusiya klublarından dəvət almışdım. Sadəcə, Adana təmsilçisində yaşadığım bəzi xoşagəlməz olaylardan sonra risk etmək istəmədim. İş elə gətirdi ki, "Qarabağ"dan təklif gəldi və dəyərləndirdim. Amin Ramazanovun sıradan çıxmasından sonra sabiq komandamı tək də qoymaq istəmədim.
- Amindən söz düşmüşkən, o səni böyük qardaş və müəllim hesab edir. Necə düşünürsən o, gələcəkdə ən azı sənin səviyyənə yüksələ biləcək?
- Bu barədə nəsə deməyim düz çıxmaq. Aminin qapıçı keyfiyyətlərini qiymətləndirmək üçün komandamızda savadlı məşqçilər korpusu var, onlar bu barədə fikir bildirə bilərlər.
- Onu yaxından tanıdığına görə bu sualı verdim...
- Amin məşqlərdə səylə çalışır və ondan tələb olunan hər şeyi edir. Qalır məşq prossesində etdiklərini meydanda nümayiş etdirmək. Məncə, şans qazandıqca özünü yaxşı tərəfdən göstərəcək.
- Səncə, geri dönməklə yenidən komandanın "1 nömrə"si ola biləcəksən?
- Geri qayıtmışamsa, deməli, qarşıma hansısa məqsədi qoymuşam. Evimdəyəm və uğurlu olacağıma əminəm.
- Yığmanın əsas qolkiperi kimi, millinin baş məşqçisi Fernandu Santuşdan nə gözləyirsən?
- Milli tam başqadı. İndi nəsə söyləməyim düz çıxmaz. Amma azarkeşlərimizə və ictimaiyyətə söz verirəm ki, futbolçu olaraq üzərimizə düşən işi maksimum yerinə yetiririk. Uğurlu çıxış eyməyimiz üçün milliyə hər cür şərait yaradılıb.
- Son mövsümü demək olar ki, Türkiyə keçirdin. Azərbaycanın qardaş ölkədən üstünlüyü nədədi?
- Azərbaycan mənim üçün Vətəndi. Evdə ana övladını necə qucaqlayır, əzizləyirsə, Azərbaycanda mənə o cür qayğıyla yanaşır. Türkiyə əhalisi ilə müqayisədə Azərbaycan xalqı daha istiqanlı, mehriban və qayğıkeşdi. Azərbaycanda və azərbaycanlılar arasında özümü heç vaxt yad hiss etməmişəm. Dünyanın çox ölkəsində olsam da, burdakı kimi özümü rahat, xoşbəxt hesab etdiyim ikinci bir yer olmayıb. Yuxarıda qeyd etdim ki, evimə qayıtmışam. Azərbaycan mənim doğma evimdi.
- Xeyli vaxtdı burdasan. Azərbaycan dilində danışmağı öyrənmisən?
- Azərbaycan dilində başa düşür və danışıram.
- O zaman sirr deyilsə, dilimizdəki hansı sözü daha çox işlədirsən?
- Xəstə (gülür)
- Xəstə (gülür)
ABDULLA İSMAYILOĞLU
