Sport24.az
"Qarabağ"ın "Şkendiya" ilə oyunları maraqlı və gərgin idman mübarizəsi şəratində keçəcək". Bu sözləri Sport24.az-a açıqlamasında Şahin Diniyev deyib.
Təcrübəli mütəxəssis UEFA Çempionlar Liqasının III təsnifat mərhələsinin ilk oyunu çərçivəsində keçiriləcək "Şkendiya" - "Qarabağ" matçı ilə bağlı gözləntilərini açıqlayıb:
"Rəqib II təsnifat mərhələsində FCSB-nı mübarizədən kənarlaşdırandan sonra Avropada adından söz etdirməyi bacarıb. Kompakt şəkildə oynayan komandadır. Futbolda proqnoz vermək çox çətindir, amma "Qarabağ"ın avrokuboklar təcrübəsi və bu gün üçün heyəti rəqibi üstələyir. "Şkendiya" yalnız kollektiv şəkildə nəsə etməyə çalışacaq. Bu sarıdan "Qarabağ"ın şansı daha çoxdur. Təbii ki, düşündüyümüz qədər asan olmayacaq. "Qarabağ" daha çox güc sərf etməlidir. Oyun baxımından problemlər var, fikrimcə, komanda oyundan-oyuna bu problemləri minimuma endirəcək".
Qeyd edək ki, "Şkendiya" - "Qarabağ" matçı avqustun 7-də keçiriləcək və Bakı vaxtı ilə saat 22:00-da başlayacaq. Komandalar arasında cavab görüşü bir həftə sonra Bakıda reallaşacaq.
