Sport24.az
"Əvvəllər deyirdik yaxşı oynayırlar milliyə dəvət almırlar. İndi onu deyə bilmərik. Təcrübəlilərin yanına gənclər gəlməlidir ki, yığmanın abu-havasını duysunlar. Millinin qapısı hamı üçün açıqdır. Ölkənin əsas komandasına Birinci Liqadan futbolçu dəvət etmək həmin liqanın səviyyəsini qaldırır". Bu sözləri Sport24.az-a açıqlamasında Şahin Diniyev bildirib.
Millimizin qarşıdakı Belarus və Haiti ilə yoldaşlıq oyunları ilə bağlı fikirlərini bölüşən mütəxəssis hər iki oyunun milli komandamızda qalib ruhunun yaranmasında vacib rol oynayacağını qeyd edib:
"Bu dəqiqə nəticə vacib olmamalıdı. Yalnız millidə qalib ruhun yaranması üçün vacib ola bilər. Fernandu Santuş yeni milli komanda yaradırsa, bu oyunlar onun hansı taktika və sistemlə çıxış etməsini futbolçulara izah etmək baxımından lazımlı olacaq. Yoldaşlıq oyunu qarşıdakı rəsmi matçlara hansı futbolçularla çıxmaq lazım olduğunu göstərə bilər".
Qeyd edək ki, Fernandu Santuşun rəhbərlik etdiyi milli martın 22-də Sumqayıtda Haiti, 25-də isə Masazırda Belarus yığması ilə qarşılaşacaq.
