Sport24.az
Azərbaycan millisi UEFA Millətlər Liqasının V turunda sabah Estoniya ilə qarşılaşacaq. Yığmanın sabiq baş məşqçisi Şahin Diniyev Sport24.az-a açıqlamasında matçdan gözləntilərini bölüşüb:
"Estoniya yığması ilə matç millimiz üçün ölüm-dirim oyunu deyil. Bu, sadəcə Millətlər Liqasının qarşılaşmasıdı. Hər bir yarışın məqsədi olur. Bu yarışın da məqsədi qrupda ilk pilləni tutub, digər Liqaya yüksəlməkdir. Millətlər Liqasının oyunları Avropa və ya Dünya Çempionatına hazırlıq baxımından işə yarayır. Fernando Santuşla bu matçlar gələcək baxımdan imtahandır. Həm futbolçuları seçimi, həm də taktiki baxımdan. Estoniya ilə oyunda minimum 3:0 hesabı ilə qalib gəlməliyik ki, aşağı dəstəyə düşməyək. Biz bunu İsveçlə oyunda edə bilmərik. Əlimizdə şans varsa, estonlarla qarşılaşmada bunu həll etməliyik. Yığmamız bu oyunda qələbə qazanarsa, futbolçularda özünə inam yaranacaq. Estoniya ilə oyun bu sarıdan vacibdir. Əksinə, məğlub olsaq, oyunçularda ruh düşkünlüyü olacaq".
Qeyd edək ki, Qəbələ şəhər stadionunda keçiriləcək Azərbaycan – Estoniya oyununa saat 18:00-da start veriləcək.
