Sport24.az
"Bu komandaların hər biri kuboka iddia edə bilər. Klublar üçün bir oyuna köklənmək asandır. Premyer Liqa isə uzun marafondur". Bu sözləri Sport24.az-a açıqlamasında Şahid Diniyev deyib.
Təcrübəli mütəxəssis Azərbaycan Kubokunun 1/4 final mərhələsinin cavab oyunları ilə bağlı fikirlərini bölüşüb:
"Qarabağ"ın finaladək irəliləyəcəyini düşürəm. Sərgilədikləri oyun, təcrübələri, heyəti bunu deməyə əsas verir. Məncə, Ağdam təmsilçisi məsələni rahatlıqla həll edəcək. Öz meydanında iki qol buraxması inandırıcı deyil. "Zirə" - "Araz-Naxçıvan" dueli çətin matç olacaq. Naxçıvan təmsilçisi minimal hesablı qələbə qazanıb. "Zirə" formada olduğu üçün daha şansı görsənir. Rəqibdə isə eniş var. "Zirə" qol vurmağa məcbur olduğu üçün qonaqlar əks-hücuma üstümlük verəcəklər".
Ş.Diniyev "Sumqayıt" - "Sabah" görüşü ilə bağlı danışıb: "Hər ikisi yaxşı formada deyil. Stabil futbol oynamırlar. Eyni durumdadırlar. Stabil oyun olmadığı üçün proqnoz vermək də çətindir. Şansları bərabər görürəm. Tərəflər qol vurmaqda çətinlik çəkirlər. Cütün taleyini bir qol həll edə bilər. "Sabah"ın şansı bəlkə də 10 faiz çoxdur. Səviyyəli futbolçuları daha çoxdur. "Neftçi"nin kubok matçında büdrəcəyinə inanmıram. Avrokubok üçün bu turnirdə mübarizəyə davam etmək istəyirlər. Düşünürəm ki, rəqibi də Premyer Liqada qalmağa köklənib. "Qarabağ" və "Neftçi" cütün taleyini ilk oyunlarda həll ediblər".
Qeyd edək ki, bu gün saat 16:00-da "Qarabağ" - "Səbail" (ilk oyun 1:0), saat 19:30-da isə "Sumqayıt" - "Sabah" (ilk oyun 0:0) qarşılaşması start götürəcək. Növbəti gün saat 16:00-da "Zirə" "Araz-Naxçıvan"ı (ilk oyun 0:1), iki saat sonra isə "Neftçi" isə "Kəpəz"i (ilk oyun 0:2) qəbul edəcək.
