Sport24.az
"Mövsümün əvvəlində komandaların maliyə durumuna görə "Neftçi" və "Sabah"ı turnir cədvəlinin yuxarı pillələrində görəcəyimizi düşünürdük. "Turan Tovuz"la "Araz-Naxçıvan" yaxşı mənada bizi təəccübləndirdi. Qalanları isə layiqli şəkildə öz yerini tutdu. "Zirə" ötən ilə nisbətən daha yaxşı futbol oynayır. Oyun baxımından inkişaf hiss olunur. Bu mövsüm keçən ilə baxanda daha rahat ikinci yeri tutdu. "Səbail"in Premyer Liqadan düşməsinə isə üzülürəm".
Bu sözləri Sport24.az-a açıqlamasında Şahin Diniyev deyib.
Mütəxəssis "Sabah" və "Qarabağ" arasında keçiriləcək Azərbaycan kubokunun final oyunu ilə bağlı fikirlərini bölüşüb:
"Çempionat matçlarında bir komanda zəif oynayıb, sonradan sabitlik yaxalaya bilir. Amma kubok oyunu bir qarşılaşmadan ibarət olduğuna görə, şansları dəyərləndirmək çətindir. Bu matçda adi səhv baha başa gələ bilər. Motivasiyadan çox şey asılı olacaq. Bu, "Sabah"da çox yüksək olacaq. Ona görə ki, avrokuboklara vəsiqə üçün yalnız bir yolu qalıb. "Qarabağ"da keyfiyyət, "Sabah"da isə yüksək motivasiya var. Proqnoz vermək çətindir. Kağız üzərində futbolçuların keyfiyyətinə görə "Qarabağ" üstün görünür".
Qeyd edək ki, final oyunu mayın 31-də Mehdi Hüseynzadə adına Sumqayıt şəhər stadionunda təşkil olunacaq.
