Idman.biz
"Doğrudan da, "Qarabağ" Azərbaycan futbolu adına böyük, şərəfli iş görür. Ən güclü 36 komandanın arasına, belə nəhəng rəqiblərlə düşmək özü bir qəhrəmanlıqdır".
İdman.biz xəbər verir ki, bu sözləri Futbolinfo.az-a açıqlamasında Azərbaycan millisinin sabiq baş məşqçisi Şahin Diniyev UEFA Çempionlar Liqasının püşkatmasından danışarkən deyib.
59 yaşlı mütəxəssis Azərbaycan çempionunun qrupdakı rəqibləri "Liverpul" (İngiltərə), "Benfika" (Portuqaliya), "Napoli" (İtaliya), "Atletik" (İspaniya), "Çelsi" (İngiltərə), "Ayntraxt" (Frankfurt, Almaniya), "Ayaks" (Niderland) və "Kopenhagen"lə (Danimarka) oyunlarından danışıb. O, qrupu qənaətbəxş sayır: "Qrup mərhələsində iştirak etmək özü bir uğurdur, çünki orada dünyanın güclü komandaları ilə üz-üzə gəlmək lazım gəlir. Razı deyiləm ki, bu qrup hamısından güclüdür. Hər qrupa baxsaq, heç birində zəif rəqib yoxdur. 36 ən güclü komanda eyni turnirdədir, Çempionlar Liqasında zəif rəqib olmur. Qrupların hər birinin özünə görə ağır yükü var. Ona görə Ağdam təmsilçisinin düşdüyü qrup da məhz belə güclü komandalardan ibarətdir".
Mütəxəssis "köhlən atlar"ın artıq sakit, rahat oynayacağını, itirəcək heç nəyinin olmadığını bildirib: "Gəlin, etiraf edək ki, bu qrandların qarşısında qrupdan çıxmaq çox çətindir. "Qarabağ" son oyunlara qrupa düşmək istəyinə çatmaq üçün təzyiq altında çıxırdı. Çünki itirəcək bir şeyi yoxdur, yalnız qazanacaq bir şeyləri var. Düşünürəm "Qarabağ" bu rəqiblər üçün qapazaltı olmayacaq və layiqli mübarizə aparacaq. Ağdam təmsilçisi və azarkeşlər üçün bu 8 oyun böyük bayramdır. Bu sarıdan "Qarabağ" öz gücünü göstərdi. İndidən demək olmaz ki, hansını udacaq, hansına uduzacaq. Amma layiqli mübarizə aparıb, qrupdakı oyunlara rəng qatacağını demək olar. Qurban Qurbanovun kollektivi artıq maksimum etdiyini edib. Bundan sonra nə qazanacaqsa, o da üstünə əlavə ediləcək. Hər bir oyun bizim üçün bayram olacaq. Həm də bu görüşlər "köhlən atlar"a böyük təcrübə qazandıracaq. Artıq neçə ildir Avropada oynayırlar. Çempionlar Liqasının yenilənmiş formatında 8 oyun və hər dəfə fərqli rəqiblə qarşılaşma olacaq. Həm ad-san, həm taktiki baxımdan fərqli komandalarla üz-üzə gələcəklər. "Qarabağ"dan böyük şeylər gözləməyək, onlar futboldan həzz almaq üçün oynamalıdır. Sadəcə uğurlar arzu edirəm. "Qarabağ" hələ bizi təəccübləndirməyə davam edəcək. İnanıram ki, komanda bu səviyyədə uğurlu çıxışını davam etdirəcək və hər oyun dəyərli təcrübə qazandıracaq".
İdman.biz
