Şahin Diniyev: “Legionerlərimizin səviyyəsi nə əladır, nə də çox pisdir”

"Yay hazırlığı arzu etdiyim ən yaxşı səviyyədə keçdi. Futbolçular toplanışa məsuliyyətlə yanaşdılar".

Bunu İdman.bizə "Səbail"in baş məşqçisi Şahin Diniyev deyib.

Təcrübəli mütəxəssis komandanın hazırlığı və onlara yeni qoşulan legionerlərin səviyyəsini dəyərləndirib: "Komandanın yaxşı formalaşması üçün zaman lazımdır. Türkiyədə fiziki, funksional və atletik hazırlığın təməlini qoyduq. Düşünürəm ki, buna nail olduq. Bundan sonra çempionatın oyunu üçün taktiki hazırlıqlar keçəcəyik. Bizə yeni qoşulan legionerlərin səviyyəsi nə əladır, nə də çox pisdir. Orta səviyyədədir. Sistemimizdə oynayan futbolçulardır. Özümüz seçmişik. Onlar "Səbail"ə, biz də onların karyerasının yüksəlməsinə kömək edəcəyik. Bundan sonra heç bir transfer olmayacaq".

Diniyev Azərbaycan Premyer Liqasının I turunda "Zirə"yə qarşı keçirəcəkləri oyuna da toxunub: "Ötən mövsüm zədələnən David Qomis məşqləri davam etdirir. Amma 100 faiz hazır deyil. Bəlkə 20-30 dəqiqə oynaya bilər. Qalan futbolçuların hər biri qarşıdakı matça tam hazırdır. "Zirə" bu gün formada olan komandadır. Formada olan, stabil "Zirə"yə qarşı stabil olmayan, tam da hazırlıqlı hesab etmədiyim "Səbail" meydana çıxacaq. Amma bu o demək deyil ki, onlar qalib gələcəklər. Maraqlı matç keçəcək".

Qeyd edək ki, "Zirə" - "Səbail" matçı avqustun 4-də saat 20:00-da keçiriləcək.

Emin Ağa
İdman.biz