Idman.biz
"Latviya dişimizə görə bir rəqibdir".
Bunu İdman.biz-ə Azərbaycan millisinin sabiq baş məşqçisi Şahin Diniyev deyib.
Təcrübəli mütəxəssis yığmamızın Latviya ilə keçirəcəyi yoldaşlıq görüşü haqqında danışıb. O bildirib ki, futbolçularımızın qələbə qazanmaq şansı var: "Milli neçə vaxtdır ki, Fernandu Santuşun rəhbərliyi altında qələbə qazanmayıb. Sabah buna son qoyulacağını düşünürəm. Son hazırlıq oyunlarımızdır. Qarşıda bizi dünya çempionatının seçmə mərhələsinin oyunları gözləyir. Çox güman, Santuş bu oyunlardan sonra əsas heyətdə kimlərin yer alması, həm də oyun sistemi baxımından qərarını verəcək. Düşünürəm ki, bu oyuna futbolçular böyük məsuliyyətlə yanaşacaq. Bu oyunun nəticəsi böyük önəm daşımır. Sadəcə yoldaşlıq oyunudur. Bir qələbə olarsa, komandanın özünəinamı artacaq. Mötəbər yarış qabağı komanda daha inamlı oynaya biləcək. Məğlubiyyət isə ruh düşkünlüyü olacaq. Buna görə də bizə mütləq qələbə lazımdır. İkinci görüşdəki Macarıstan bizdən güclüdür, ancaq Latviya üzərində qələbə qazana bilərik".
Qeyd edək ki, iyunun 7-də keçiriləcək Latviya - Azərbaycan görüşü Bakı vaxtı ilə saat 17:00-da başlayacaq.
Aytac Sahəd
İdman.biz
