Idman.biz
Azərbaycan millisinin DÇ-2026-nın seçmə mərhələsində növbəti oyunu oktyabrın 10-da keçiriləcək. Yığmamız səfərdə dünyanın ən güclü komandalarından biri – Fransa ilə üz-üzə gələcək.
İdman.biz xəbər verir ki, Fransa millisi ilə görüşlər Azərbaycan futbolu üçün xoş xatirələrlə yadda qalmayıb. Düz 30 il əvvəl, 1995-ci il sentyabrın 6-da Oser şəhərində keçirilən AVRO-1996-nın seçmə mərhələsində yığmamız tarixinin ən ağır məğlubiyyətini almışdı. Ağasəlim Mircavadovun rəhbərlik etdiyi komanda fransızlara 0:10 hesabı ilə uduzmuşdu.
Həmin seçmə mərhələdə komandalar ilk dəfə 1994-cü il dekabrın 13-də Trabzonda qarşılaşıblar və Fransa 2:0 hesabı ilə qalib gəlib.
Fransa ilə qarşıdakı oyun ərəfəsində İdman.biz-ə danışan təcrübəli mütəxəssis Şahin Diniyev 30 il əvvəl futbolçu kimi çıxış etdiyi həmin görüşləri xatırlayıb və yeni matç barədə fikirlərini bölüşüb.
– Fransa yığmasına qarşı keçiriləcək qarşıdakı oyunla bağlı gözləntiləriniz necədir?
– Düşünürəm ki, istənilən azərbaycanlı mütəxəssisdən soruşsanız, kimsə nikbin nəsə cavab verməz. Real vəziyyəti anlamalıyıq, optimist olmaq olmur. Buna baxmayaraq, biz millimizi dəstəkləməliyik. Rəqib kim olur-olsun, hamımız istəyirik ki, Azərbaycan futbolu adına uğurlu çıxış olsun.
Aydındır ki, Fransa yığması bizdən qat-qat güclüdür. Bizim futbolçular yalnız döyüşkənlik hesabına müqavimət göstərə bilər. Nə qədər bacaracağımızı bilmirəm, amma çalışmalıyıq. Bu, çox çətin oyun olacaq. Ümid edirəm, bu görüşdə bəxtimiz gətirər.
– Fransızlara qarşı keçirilən həmin məşum oyunu çoxları indi də xatırlayır. Siz də həmin görüşdə meydanda idiniz…
– Bilirsiniz, o vaxt indiki kimi taktiki hazırlıq üçün vaxtımız yox idi. Komandaya bir çox futbolçular xaricdən gəlirdi – Vəli Qasımov, mən, Nizami Sadıqov, Aleksandr Jidkov və başqaları. Həmin matç üçün də xüsusi taktiki planımız yox idi, hər kəs öz oyununu oynayır, fərdi ustalığını göstərməyə çalışırdı. Komanda şəklində hazırlıq üçün vaxt çatmırdı.
– O oyunun gedişatını necə xatırlayırsınız?
– Maraqlıdır ki, görüşə çox yaxşı başladıq, rəqibin qapısı qarşısında üç qol epizodu yaratdıq. Xatırlayıram, mən, Yunis Hüseynov və Rasim Abışov qapıya zərbələr endirdik. Yəni oyunun əvvəlində üstünlük bizdə idi.
Sonra isə hər şey dəyişdi (gülür). O, çox güclü Fransa yığması idi və bizə onlara qarşı oynamaq çox çətin idi. Qapımıza hər nə vurulurdusa, qol olurdu. Əslində, hesab oyuna görə deyildi. 5–6 top fərqi ilə uduzmalıydıq, 10 yox. Elə qollar buraxırdıq ki, indi xatırlayanda həm gülməli, həm də dəhşətlidir.
– Bu dəfə fransızların bəxtinin əvvəlki kimi gətirməyəcəyinə inanırsınızmı?
– Düşünürəm ki, belə hesab bir daha təkrarlanmayacaq. Fransızların bu oyuna İspaniya, İtaliya kimi top komandalarla oyunlardakı kimi yanaşacağını düşünmürəm. Yəqin ki, bizi rahat udacaqlarına inanacaqlar. Bu faktor bizə müəyyən üstünlük verə bilər.
– 30 il əvvəlki Fransa və Azərbaycan yığmalarını indiki komandalarla müqayisə etsək, sizcə, hansı daha güclü idi?
– Məncə, hər iki yığma o vaxt daha güclü idi. Xüsusilə bizim komanda fərdi ustalıq baxımından indiki heyətdən üstündür. Bəli, komanda oyununda zəif idik, çünki taktiki sistem yox idi, hazırlıq üçün də vaxt az idi. Amma fərdi keyfiyyətlərə baxsaq, 30 il əvvəlki Azərbaycan yığması indiki komandadan xeyli güclü idi.
Teymur Tuşiyev
