Report.az
Azərbaycanın çimərlik futbolu millisi Avropa çempionatının final mərhələsinin yarımfinalına çıxmaqla əsas missiyalardan birini yerinə yetirib.
Bunu "Report"a açıqlamasında millinin baş məşqçisi Sahib Məmmədov deyib.
O, A Divizionun vəsiqə qazanmaq yarımfinalda Rumıniyanı məğlub etmək istədiklərini söyləyib:
"Litvaya 1:2 hesabı ilə uduzduq. Amma bu oyunun nəticəsindən asılı olmayaraq əsas missiyalardan birini yerinə yetirib yarımfinala vəsiqə qazanmışdıq. Uduzsaq Qazaxıstanla görüşəcəkdik. Qələbə qazandıq, rəqibimiz Rumıniya oldu və onlarla sabah qarşılaşacağıq. Hər iki komanda eyni səviyydədir demək olar. Ən vacib oyundur, qələbə qazanmaq lazımdır ki, həm finala, həm də A Divizionuna vəsiqə əldə edək".
Mütəxəssis Litva ilə matçda xeyli qol vəziyyətlərindən yararlana bilmədiklərini də deyib:
"Şükür ki, futbolçularımız nə zədələndi, nə də qırmızı vərəqə gördü. Litva ilə matçda qol vəziyyətlərimiz çox olsa da yararlana bilmədik. Daha əvvəl də Litva ilə qarşılaşmışdıq və demək olar eyni ssenari yaşandı. Hücumları dəyərləndirə bilmədik və uduzduq. Sabah ən böyük missiyanı yerinə yetirib finala vəsiqə qazanmalıyıq".
Qeyd edək ki, milli Litva ilə görüşdə 1:2 hesabı ilə məğlub olsa da yarımfinala vəsiqə qazanıb. Komanda ötən gün Belçikanı 5:4 hesabı ilə məğlub etmişdi.
