Idman.biz
II Liqada çempion olan "Şahdağ Qusar"ın baş məşqçisi Elnur Abdullayevin futbolinfo.az saytına müsahibəsi
– II Liqada mövsümü məğlubiyyətsiz başa vuraraq çempion oldunuz. Təəssüratlarınız necədir?
– Haqq etdiyimiz çempionluq oldu. Bu, ikili çempionluqdur. O mənada ki, mövsüm ərzində məğlubiyyətlə üzləşmədik. Həqiqətən də, məğlubiyyətsiz çempionluq gözəl bir şeydir. Mən futbolçularıma hər zaman güvənirdim. İnanın mənə ki, mövsümün sonuna 6 tur qalmış I Liqaya vəsiqəni təmin etsək də, həmin vaxt uşaqlarda sevinc görmədim. Çünki qarşımıza konkret olaraq çempionluq məqsədi qoymuşduq. Normal halda I Liqaya vəsiqə qazanırsansa, bu da çempionluq kimi bir şeydir. Amma bu, bizim üçün yetərli deyildi, konkret olaraq çempionluğu hədəfləmişdik. Layiq olduğumuz çempionluğu da əldə etdik. Futbolçularımı, klub rəhbərliyini və "Şahdağ Qusar" azarkeşlərini ürəkdən təbrik edirəm.
– "Şəfa" ilə son turadək aranızda ciddi çempionluq mübarizəsi getdi və yekunda onları 1 xalla qabaqladınız. "Şəfa"nın bu dərəcədə rəqabət göstərəcəyini gözləyirdiniz?
– "Şəfa" II Liqada olmasaydı, çempionluğu 6 tur qabaq rəsmiləşdirə bilərdik. Həqiqətən də, aramızda yaxşı mübarizə getdi. Birinci dövrədə "Şəfa"ya 7:1 hesabı ilə qalib gəldik. Bundan sonra "Şəfa"da, deyərdim ki, 90 faiz dəyişiklik oldu: məşqçini dəyişdilər və heyətə təcrübəli futbolçular cəlb etdilər. Artıq bundan sonra çətin olacağını bilirdik. İkinci dövrə bizim üçün ilk dövrədən daha çətin keçdi. Lider olduğumuz üçün rəqiblər bizə qarşı başqa motivasiya ilə oynayırdılar. Biz bunu dərk etdiyimiz üçün hər matça final kimi baxırdıq. "Şəfa" ilə Bakıdakı görüşümüz finala bərabər idi. Həmin oyunu da yaxşı keçirdik, futbolçularım tapşırdığım hər şeyi yerinə yetirdilər və sonda meydanı 1 xalla tərk etdik. Bu, çempionluq xalı idi. Yekunda da çempion biz olduq.
– "Şahdağ Qusar" növbəti mövsümdə I Liqada çıxış edəcək. Hədəfiniz nə olacaq? Bu liqada da çempionluq mübarizəsi apara biləcəksiniz?
– Hazırda bu barədə heç bir şey deyə bilmərəm. Yaxınlarda rəhbərliklə görüşümüz olacaq. Rəhbərliyin nə tələb etdiyini, qarşımıza hansı hədəfi qoyduğunu biləndən sonra bu barədə məlumat verə bilərəm.
– II liqada oyunlarınızı məcburiyyətdən Şamaxıda keçirirdiniz. "Şahdağ Qusar"ın stadionundakı təmir işləri ilə bağlı vəziyyət nə yerdədir? I Liqada rəqiblərinizi Qusarda qəbul edə biləcəksiz?
– Ev oyunlarını Qusarda keçirsək, möhtəşəm azarkeşlərimizin hesabına oyunlara 1:0 öndə başlayacağıq. İnşallah, stadion tez bir zamanda bərpa olunar və rəqiblərimizi Qusarda qəbul edərik.
– Komandanın kapitanı Rahid Əmirquliyevin I Liqada da oyunçu kimi "Şahdağ Qusar"a kömək edib-etməyəcəyinə aydınlıq gəlib?
– Rahidlə bu haqda öz aramızda söhbət edəcəyik. Bu, elə şeydir ki, qərarı futbolçu özü verməlidir. Özünə də demişəm ki, qərarı özü versin. Futbolçu oynaya bilirsə, gücü varsa, komandaya kömək edə bilirsə, mənim üçün onun hansı yaşda olması fərq etmir. Rahid nə qərar verəcəksə, ona hörmətlə yanaşacağıq. Yanındayam, dəstəyəm. Nə qərar verəcəyini zaman göstərəcək.
İdman.biz
