Idman.biz
Seneqallı futbolçu Sadio Maneni doğulduğu kənddə xeyriyyəçilik işlərinə başlayıb.
İdman.Biz xəbər verir ki, bu barədə insayder Fabritsio Romano məlumat yayıb.
Onun sözlərinə görə, seneqallı hücumçu doğulduğu Bambali kəndini tam şəkildə yenidən inşa etdirir və geniş sosial layihələr həyata keçirir.
Xəbərdə bildirilir ki, Mane kənddə xəstəxana, məktəb, poçt bölməsi, yanacaqdoldurma məntəqəsi, stadion və 4G rabitə şəbəkəsi kimi infrastruktur obyektlərinin tikintisini şəxsi vəsaiti ilə maliyyələşdirib.
Bundan əlavə, Bambali sakinlərinin sosial rifahını yaxşılaşdırmaq məqsədilə hər bir kənd sakininə aylıq 70 avro(137 manat - red.) yardım verilir.
Futbolçu dəfələrlə bildirib ki, qazandığı uğurun əsas məqsədi doğma yurduna və ehtiyacı olan insanlara dəstək olmaqdır. Onun bu addımları həm Seneqalda, həm də beynəlxalq idman ictimaiyyətində böyük rəğbətlə qarşılanır.
Qeyd edək ki, Sadio Mane hazırda Səudiyyə Ərəbistanının "Ən-Nəsr" klubunda çıxış edir.
