Idman.biz
Türkiyənin "Fənərbağça" klubunda N"Qolo Kante transferi ilə bağlı proses davam edir. Klub fransız yarımmüdafiəçini heyətinə qatmaq üçün danışıqları davam etdirir və klub rəhbərliyi bu transferdən geri addım atmaq niyyətində deyil.
İdman.Biz xəbər verir ki, transfer toplantısı zamanı klub prezidenti Sadəddin Saran mövqeyini açıq şəkildə ortaya qoyub.
O bildirib ki, azarkeşlərin bu transferə böyük marağı var və rəhbərlik son ana qədər şərtlərində israrlı olacaq:
"Tərəfdar bu transferi istəyir. Bu yoldan geri dönə bilmərik. Son ana qədər bütün imkanları yoxlayacağıq".
Qeyd edək ki, Fənərbağça daha əvvəl N"Qolo Kante ilə razılıq əldə edib, lakin futbolçunun hazırkı klubu "Əl-İttihad"la danışıqlar hələ yekunlaşmayıb. Səudiyyə Ərəbistanı təmsilçisi 34 yaşlı yarımmüdafiəçi üçün yüksək transfer haqqı tələb edir. Klub isə bu tələbi qəbul etməyib.
Məlumatlara görə, "Fənərbağça" nümayəndələri Kante transferi ilə bağlı iki dəfə Əbu-Dabiyə səfər edib. Klub daxilində aparılan müzakirələrdə bu keçidin mövsümün ən vacib transferlərindən biri olduğu vurğulanıb.
Xatırladaq ki, 2023-cü ildən "Əl-İttihad"da çıxış edən N"Qolo Kante bu mövsüm 23 oyunda meydana çıxıb və bir məhsuldar ötürmə edib. Onun Səudiyyə klubu ilə müqaviləsi 2026-cı ilin 30 iyununda başa çatır.
Fransız yarımmüdafiəçi karyerası ərzində "Bulon", "Kan", "Lester Siti" və "Çelsi" kimi klubların da formasını geyinib.
