Idman.biz
"Sabah" stabil oyun sərgiləmir".
Bunu "Sabah"ın sabiq kapitanı Kərim Diniyev Sportal.az-a müsahibəsində deyib.
Həmin müsahibəni təqdim edirik:
- "Sabah"dan bu mövsüm gözləntilər yüksəkdir. Artıq 6 tur geridə qalıb. Sabiq komandanın bu mövsümkü çıxışını necə dəyərləndirirsən?
- Çempionat hələ yeni başlayıb və nəsə demək düzgün olmazdı. "Sabah" 5 oyun keçirib və yalnız 1 məğlubiyyəti var. Amma o məğlubiyyət də, "İmişli" ilə görüşdə gözlənilməz oldu. "Şamaxı" və "Turan Tovuz"a qalib gəliblərsə, "Neftçi" ilə heç-heçə də komandanın müsbət mənada aktivinə yazmaq olar. Yalnız "İmişli" məğlubiyyəti həm oyun, həm də nəticə baxımından gözləmilməz idi. Futbolda da belə şeylər olur da.
- Valdas Dambrauskasın "Sabah"dakı işini necə dəyərləndirirsən? Səncə, litvalı mütəxəssis bu komandada öz oyun sistemini qura bilib və ondan uğurlu nəticə gözləmək olar?
- Şəxsi fikrim belədir ki, "Sabah" stabil oyun sərgiləmir. "Turan Tovuz" üzərində inamlı qələbə zamanı tamam başqa "Sabah" var idi. "İmişli"yə uduzan isə tamam fərqli "Sabah" idi. Uğurlu olub-olmayacağını zaman göstərəcək. Hər halda, klub rəhbərliyi bunu daha yaxşı bilər.
- Ancaq Murad Musayevin vaxtında "Sabah" o qədər effektiv oynayırdı ki, sanki o "planka"nı aşa bilən məşqçi yoxdur. Razısan ki, "Sabah" ən yaxşı oyununu məhz Musayevin rəhbərliyi altında göstərirdi?
- Tamamilə razıyam. Yəqin hər kəs belə düşünür ki, Murad Musayevin vaxtındakı "Sabah" tamam başqa komanda idi. Son illərdə "Qarabağ"ın səviyyəsinə və "Qarabağ"la başabaş mübarizə aparan 2 komanda olubsa, onlardan biri Murad Musayevin vaxtındakı "Sabah" idi.
- Bu mövsümkü "Sabah" "Qarabağ"la çempionluq mübarizəsi apara biləcək?
- Çətin görünür. Çünki "Qarabağ" haqda nəsə artıq şərhə ehtiyac yoxdur. Həqiqətən də, "Qarabağ" Azərbaycanın qürurudur. "Sabah"ın çempionluq mübarizəsinə qoşulması real görünmür. Amma avrokuboklar üçün mübarizə aparacaqları dəqiqdir.
- "Sabah"da daha çox hansı mövqenin gücləndirilməsinə ehtiyac var?
- Bunu baş məşqçi və klub rəhbərliyi daha yaxşı bilər. Onlar işin içindədirlər. Hər mövqedə yaxşı oyunçuları var. Yəqin ki, onlar ehtiyac yaranarsa, qış fasiləsində güclənməyi məqbul bilsələr, transferlər edərlər.
